महाराष्ट्राचे मुख्यमंत्री देवेंद्र फडणवीस यांनी आज मुंबईहून शिर्डीकडे वंदे भारत एक्सप्रेस मधून प्रवास करत एक वेगळा संदेश दिला. नेहमीप्रमाणे मोठा शासकीय ताफा न घेता त्यांनी सर्वसामान्य प्रवाशांप्रमाणे रेल्वेने प्रवास करण्याचा निर्णय घेतला. त्यांच्या या साध्या आणि वेगळ्या शैलीची राजकीय तसेच सोशल मीडियावर मोठ्या प्रमाणात चर्चा सुरू झाली आहे.
मुख्यमंत्री फडणवीस यांच्यासोबत या प्रवासात आमदार प्रसाद लाड देखील उपस्थित होते. प्रवासादरम्यान मुख्यमंत्री काही वेळ सहप्रवाशांशी संवाद साधताना दिसले. नागरिकांच्या प्रतिक्रिया जाणून घेत त्यांनी प्रवासाचा अनुभवही शेअर केला. मात्र, या संपूर्ण प्रवासात सर्वाधिक लक्ष वेधून घेतले ते त्यांच्या कामाच्या शिस्तीने. प्रवास सुरू असतानाच त्यांनी आपल्या अधिकृत फाईल्स बाहेर काढून काम करण्यास सुरुवात केली. ट्रेनमध्ये बसून काम पूर्ण करतानाचा त्यांचा व्हिडिओ सोशल मीडियावर मोठ्या प्रमाणात व्हायरल होत आहे.
यापूर्वीही पंतप्रधानांच्या आवाहनानंतर फडणवीस मंत्रालयात बाईकवरून पोहोचले होते. त्यामुळे त्यांच्या साधेपणाची आणि वेगळ्या कार्यशैलीची चर्चा रंगली होती. आता वंदे भारतमधील त्यांचा प्रवास आणि ट्रेनमध्येच काम करण्याची पद्धत पुन्हा चर्चेचा विषय ठरली आहे. अनेकांनी त्यांच्या या कृतीचे कौतुक करत “कामाप्रती समर्पण” असे वर्णन केले आहे.
दरम्यान, मुख्यमंत्री रेल्वेने प्रवास करत असल्याची माहिती मिळाल्यानंतर अनेक प्रवाशांनी त्यांच्यासोबत संवाद साधण्याचा प्रयत्न केला. काहींनी सेल्फी घेतले, तर काहींनी त्यांच्या कामाच्या पद्धतीचे कौतुक केले. या संपूर्ण प्रवासामुळे मुख्यमंत्री फडणवीस पुन्हा एकदा सोशल मीडियावर चर्चेच्या केंद्रस्थानी आले आहेत.
