आई-वडिलांच्या घटस्फोटाचा अनुभवावरून साराचा मोठा धडा; लग्नाच्या दबावापेक्षा करिअर आणि स्वतःच्या विकासाला दिले प्राधान्य
बॉलिवूड अभिनेत्री सारा अली खान आज ३० वर्षांची झाली असली, तरी ती अजूनही सिंगल आहे. आजवर तिचे नाव अनेक सेलिब्रिटींसोबत जोडले गेले, परंतु तिने कधीही आपल्या कोणत्याही नात्यावर अधिकृत शिक्कामोर्तब केले नाही. नुकत्याच दिलेल्या एका मुलाखतीत साराने तिचे रिलेशनशिप, लग्न आणि सिंगल राहण्यामागचे कारण यावर अत्यंत स्पष्ट आणि रोखठोक मत मांडले आहे. लग्न करण्याच्या सामाजिक दबावाला बळी पडण्यापेक्षा तिने संयम राखणे पसंत केले आहे. आपल्या आसपासच्या अनेक मित्र-मैत्रिणींचे विवाह झाले असले, तरी घाईघाईने जोडीदार शोधण्याऐवजी स्वतःच्या वैयक्तिक विकासाला आणि करिअरला प्राधान्य देत असल्याचे तिने सांगितले.
लग्नाविषयी बोलताना सारा म्हणाली की, विवाह बंधनाबाबत तिच्या मनात कोणताही भ्रम किंवा सुवर्णचित्रे नाहीत; कारण सर्वच लग्ने सुखी आणि यशस्वी असतात असे नाही. ती म्हणाली, “माणूस आपल्या अनुभवातून आणि आजूबाजूच्या परिस्थितीवरून शिकतो. मी पाहिले आहे की, सर्वच लग्ने यशस्वी ठरत नाहीत आणि काही निर्णय पूर्णपणे चुकतात. अशा वेळी घाई करून चुकीचा निर्णय घेण्यापेक्षा, योग्य वेळेची प्रतीक्षा करणे आणि योग्य व्यक्तीची निवड करणे कधीही उत्तम.” पुढे अत्यंत स्वाभिमानाने बोलताना साराने स्पष्ट केले की, “माझे आयुष्य पूर्ण करण्यासाठी मला कोणत्याही पुरुषाची गरज नाही. आज माझ्याकडे ते सर्व काही आहे, ज्यामुळे मी लग्न न करताही माझे आयुष्य अतिशय चांगल्या आणि स्वतंत्र पद्धतीने जगू शकते. मी सध्या कोणाच्याही शोधात नाही.”
साराच्या या विचारांमागे तिच्या आई-वडिलांच्या म्हणजेच सैफ अली खान आणि अमृता सिंग यांच्या अपयशी ठरलेल्या वैवाहिक आयुष्याचा मोठा वाटा आहे. अमृता आणि सैफ यांनी अत्यंत तरुण वयात लग्न केले होते, मात्र त्यांचे नाते फार काळ टिकू शकले नाही आणि शेवटी ते विभक्त झाले. घटस्फोटानंतर सैफने करीना कपूरशी दुसरे लग्न केले, पण अमृता सिंग यांनी दुसरा विवाह न करता ‘सिंगल मदर’ म्हणून सारा आणि इब्राहिम या दोन्ही मुलांचा अत्यंत खंबीरपणे सांभाळ केला. आईचा हाच स्वाभिमान साराच्या विचारांमध्येही दिसून येतो. सध्या तिचे पूर्ण लक्ष करिअरवर असून, तिचा ‘पती पत्नी और वो २’ हा चित्रपट नुकताच चित्रपटगृहात प्रदर्शित झाला आहे. जर भविष्यात योग्य वेळी योग्य व्यक्ती आयुष्यात आली, तरच ती लग्नाचा विचार करेल, अन्यथा घाईगडबडीत कोणताही चुकीचा निर्णय घेण्याची तिची अजिबात तयारी नाही.
