‘लॉक अप २’ मध्ये माधुरीचे ‘श्रीमंती घमंडी’चे हिडीस रूप; शाहरुख खानचे उदाहरण देत केलेल्या वक्तव्यावर तीव्र टीका
‘शार्क टँक इंडिया’ फेम प्रसिद्ध उद्योजक अश्नीर ग्रोवर यांची पत्नी आणि स्वतः उद्योजक असलेली माधुरी जैन ग्रोवर सध्या एका अत्यंत वादग्रस्त विधानामुळे सोशल मीडियावर नेटकर्यांच्या निशाण्यावर आली आहे. रियालिटी शो ‘लॉक अप २’ (Lock Upp 2) च्या एका भागात स्वतःला एलिमिनेशनपासून वाचवण्यासाठी स्पर्धकांना वैयक्तिक आयुष्यातील काही गुपिते सांगायची होती. यादरम्यान, माधुरीने तिच्या आयुष्यातील एक खंत व्यक्त केली. तिने सांगितले की, तिला आणि अश्नीरला तिसरे मूल हवे होते, परंतु कुटुंबियांचा पाठिंबा नसल्यामुळे आणि नंतर काही वैद्यकीय अडचणींमुळे त्यांना तिसरे अपत्य होऊ शकले नाही. मात्र, या गुपितापेक्षा तिने त्यानंतर कुटुंबाचे नियोजन आणि संपत्ती यावर लावलेल्या तर्कामुळे नेटकऱ्यांमध्ये तीव्र संतापाची लाट पसरली आहे.
माधुरी जैन हिने श्रीमंत आणि गरिबांच्या मुलांची तुलना करताना म्हटले, “तिसरं अपत्य तुम्हाला नेहमी तरुण ठेवतं. जर तुम्ही शाहरुख खानसह सर्व श्रीमंत लोकांकडे पाहिले तर त्यांना तिसरे अपत्य आहे. ‘हम दो, हमारे दो’ हा नियम सगळ्यांनाच लागू होत नाही. श्रीमंत लोक जितकी जास्त मुले जन्माला घालतील, तितकी त्यांची श्रीमंती वाढेल; पण गरिबांनी मुले जन्माला घातली तर गरिबी आणखी वाढेल.” मानवी अस्तित्वाला केवळ बँक बॅलेन्सशी जोडणाऱ्या तिच्या या विधानामुळे सोशल मीडियावर नेटकऱ्यांनी तिच्यावर ‘उच्चभ्रू वर्गाचा अहंकार’ (Elitism) असल्याचा गंभीर आरोप केला आहे. एका युझरने संताप व्यक्त करत लिहिले की, “या महिलेला अर्थव्यवस्था किंवा लोकसंख्येचे काहीही ज्ञान नाही, पैशाच्या घमंडीचे हे सर्वात वाईट रूप आहे.” तर दुसऱ्या एका युझरने म्हटले की, “श्रीमंतांना गरिबांचे शोषण ही कधीच समस्या वाटत नाही, त्यांना केवळ गरिबांच्या अस्तित्वाचीच अडचण असते.”
दुसरीकडे, ‘लॉक अप २’ या शो बद्दल सांगायचे तर, हा शो सध्या नवनवीन ड्रामा आणि वादांमुळे चांगलाच चर्चेत आहे. नुकत्याच झालेल्या एका खास भागात बॉलिवूड अभिनेत्री कंगना राणौतने विशेष पाहुणी म्हणून हजेरी लावली होती. तिने जेलमधील स्पर्धकांना त्यांच्या खराब कामगिरीवरून चांगलेच खडे बोल सुनावले आणि खेळ सुधारण्याचा इशारा दिला. याच भागात खेळातील कमी योगदानामुळे श्रेष्ठा अय्यर ही या शोमधून बाहेर पडणारी पहिली स्पर्धक ठरली आहे. एकीकडे शोमधील एलिमिनेशनचे नाट्य रंगत असताना, दुसरीकडे मात्र माधुरी जैन हिच्या या ‘अजब’ विधानाचे पडसाद संपूर्ण सोशल मीडियावर उमटताना दिसत आहेत.
