२०१९ मधील पुलवामा दहशतवादी हल्ल्याचा प्रमुख सूत्रधार मानला जाणारा दहशतवादी हमजा बुरहान याचा पाकिस्तानमध्ये गोळ्या झाडून खात्मा करण्यात आल्याची माहिती समोर आली आहे. पाकिस्तानव्याप्त काश्मीरमधील मुजफ्फराबाद येथे अज्ञात हल्लेखोरांनी त्याच्यावर अचानक गोळीबार केला. या हल्ल्यात हमजा बुरहान जागीच ठार झाल्याचे सांगितले जात आहे. या घटनेमुळे दहशतवादी संघटनांमध्ये खळबळ उडाली असून सुरक्षा यंत्रणांकडून या प्रकरणाकडे बारकाईने पाहिले जात आहे.
मिळालेल्या माहितीनुसार, हमजा बुरहान हा मुजफ्फराबादमधील आपल्या कार्यालयात उपस्थित होता. त्यावेळी काही अज्ञात व्यक्तींनी कार्यालयात प्रवेश करत त्याच्यावर जवळून गोळ्या झाडल्या. अचानक झालेल्या या हल्ल्यात त्याला बचावाची कोणतीही संधी मिळाली नाही. हल्लेखोर घटनास्थळावरून फरार झाले असून त्यांची ओळख अद्याप समोर आलेली नाही.
हमजा बुरहान हा १४ फेब्रुवारी २०१९ रोजी जम्मू-श्रीनगर राष्ट्रीय महामार्गावर झालेल्या भीषण पुलवामा हल्ल्याशी संबंधित होता. त्या हल्ल्यात केंद्रीय राखीव पोलीस दलाच्या ताफ्यावर आत्मघाती कार बॉम्बद्वारे हल्ला करण्यात आला होता. स्फोटकांनी भरलेली कार सीआरपीएफच्या बसला धडकवण्यात आली आणि झालेल्या प्रचंड स्फोटात ४० जवान शहीद झाले होते, तर अनेक जवान गंभीर जखमी झाले होते. या हल्ल्याची जबाबदारी पाकिस्तानस्थित जैश-ए-मोहम्मद या दहशतवादी संघटनेने स्वीकारली होती.
पुलवामा हल्ल्यानंतर भारताने २६ फेब्रुवारी २०१९ रोजी बालाकोट येथे हवाई कारवाई करत दहशतवादी तळांवर मोठा हल्ला केला होता. त्या कारवाईत अनेक दहशतवादी ठार झाल्याचा दावा करण्यात आला होता. आता हमजा बुरहानच्या मृत्यूमुळे पुन्हा एकदा पुलवामा हल्ल्याच्या आठवणी ताज्या झाल्या आहेत.
