नागपूर शहरातील पाचपावली परिसरात भरदिवसा गोळीबाराची घटना घडल्याने खळबळ उडाली आहे. कमाल चौक परिसरात अजय चिंचखेडे यांच्यावर अज्ञात हल्लेखोरांनी जीवघेणा हल्ला केला. मात्र, गोळी लक्ष्यावर न लागल्याने चिंचखेडे थोडक्यात बचावले असून मोठी दुर्घटना टळली.
प्राथमिक माहितीनुसार, हल्लेखोरांनी कमाल चौक परिसरात अजय चिंचखेडे यांना निशाणा बनवत गोळीबार केला आणि त्यानंतर घटनास्थळावरून पसार झाले. या घटनेनंतर परिसरात भीतीचे वातावरण निर्माण झाले असून नागरिकांमध्ये चिंतेचे वातावरण आहे.
पोलिसांच्या प्राथमिक तपासानुसार, हा हल्ला जुन्या वैमनस्यातून झाल्याची शक्यता व्यक्त केली जात आहे. घटनेची माहिती मिळताच पोलिसांनी तातडीने घटनास्थळी पोहोचून तपास सुरू केला. परिसरातील सीसीटीव्ही फुटेज तपासले जात असून हल्लेखोरांची ओळख पटवण्याचे प्रयत्न सुरू आहेत.
हल्ल्यामागील नेमके कारण, आरोपींचा उद्देश आणि घटनेतील इतर बाबींचा तपास पोलीस करत आहेत. फरार आरोपींना पकडण्यासाठी विशेष पथके कामाला लावण्यात आली असून लवकरच या प्रकरणाचा उलगडा करण्याचा प्रयत्न सुरू आहे.
