आजच्या काळात फॅटी लिव्हर आजार हा सर्वात सामान्य आजार बनला आहे. अनेक जनांना यामुळे शरीरात त्रास होत आहे. लिव्हरच्या आजाराने दरवर्षी जगभरात अंदाजे 20 लाख लोक मरतात. फॅटी लिव्हरचा आजार जीवनशैलीच्या चुकीच्या सवयींमुळे होतो, त्याबरोबरच चुकीच्या आहारामुळे देखील होतो. लिव्हरचा आजार दोन प्रकारचा असतो एक म्हणजे अल्कोहोलिक फॅटी लिव्हर आणि नॉन-अल्कोहोलिक फॅटी लिव्हर. नॉन-अल्कोहोलिक फॅटी लिव्हर आजाराचे रुग्णही वाढताना दिसत आहेत.
अनेकांना असे वाटते की जास्त नॉनवेज खाल्ल्याने, तेल-तुपाचे पदार्थ खाल्ल्याने किंवा जंक फूड खाल्ल्यानेच लिव्हरचा त्रास होतो. काही अंशी ते बरोबर देखील आहे. पण त्याहीपेक्षा एक घटक जो हि लिव्हरसाठी सगळ्यात धोकादायक मानला जातो, तो म्हणजे फ्रुक्टोज कॉर्न सिरप. हा पदार्थ यकृतासाठी सर्वात धोकादायक मानला जातो.अमेरिकेतील थायरॉईड आणि PCOS आरोग्य तज्ञ डॉ. एड्रियन स्झनाजडर यांनी इंस्टाग्रामवर एक व्हिडिओ शेअर केला, ज्यामध्ये त्यांनी यकृतासाठी कोणते पदार्थ सर्वात धोकादायक मानले जातात हे स्पष्ट केले आहे.
हा घटक सर्वात जास्त प्रक्रिया केलेले पदार्थ आणि गोड पेयांमध्ये आढळतो. जसे कुकीज, कँडीज, तृणधान्ये, सॉफ्ट ड्रिंक्स आणि सॉस.” जेव्हा हे पदार्थ खातो तेव्हा फ्रुक्टोज यकृतातील चरबीमध्ये रूपांतरित होतो. ज्यामुळे फॅटी लिव्हर आजाराचा धोका नक्कीच वाढतो.म्हणून, ताजी फळे खा आणि प्रक्रिया केलेले पदार्थ टाळा.
फ्रुक्टोज हे गोड पेये, प्रक्रिया केलेले स्नॅक्स आणि कँडीज, थंड ड्रिंक्स , सॉस, दही यामध्ये साखरेचा आढळणारा एक प्रकार आहे. जरी फ्रुक्टोज नैसर्गिकरित्या फळे आणि भाज्यांमध्ये देखील आढळत असले तरी औद्योगिक फ्रुक्टोज जसे की सुक्रोज आणि उच्च-फ्रुक्टोज कॉर्न सिरप लिव्हरसाठी हानिकारक आहे. आश्चर्याची बाब म्हणजे, सर्व प्रकारच्या पेये आणि प्रक्रिया केलेल्या पदार्थांमध्ये औद्योगिक फ्रुक्टोजचा वापर केला जातो. हे नॉन-अल्कोहोलिक फॅटी लिव्हरच्या आजाराचे एक मुख्य कारण आहे असे म्हणतात.
जेव्हा आपण फ्रुक्टोज खातो तेव्हा ते पहिले आतड्यांमध्ये प्रवेश करते. तेथे, ते आतड्यांतील अस्तर आणि आतड्यांमधील चांगल्या बॅक्टेरियाच्या संतुलनावर परिणाम करू शकते. त्यामुळे पोषक तत्वांचे आणि चरबी तयार करणाऱ्या पदार्थांचे शोषण वाढते, जे नंतर थेट यकृतात जाते. आतड्यांतील बॅक्टेरियाद्वारे उत्पादित फ्रुक्टोजचे, एसीटेट आणि ब्युटायरेट यांचे उच्च प्रमाण लिव्हरमध्ये चरबी वाढवते. त्यामुळे चरबी जमा होते आणि यकृताचे नुकसान होते. जास्त फ्रुक्टोजमुळे शरीरात जळजळ देखील होते.
म्हणून, पुढच्या वेळी जेव्हा तुम्ही प्रक्रिया केलेले अन्न किंवा साखरेचे पेय निवडता तेव्हा लक्षात ठेवा की त्यामध्ये उच्च फ्रुक्टोज कॉर्न सिरप तुमच्या लिव्हरसाठी किती धोकादायक असू शकते. तुमचे यकृत निरोगी ठेवण्यासाठी, ताजी फळे आणि भाज्या खा आणि प्रक्रिया केलेले अन्न टाळा.
