पावसाळ्याच्या दिवसांत वाढलेली आर्द्रता आणि दमट वातावरण जीवाणू व विषाणूंच्या वाढीस पोषक ठरते. त्यामुळे या काळात डोळ्यांशी संबंधित संसर्गजन्य आजारांचे प्रमाण वाढताना दिसते. विशेषतः कन्जक्टिव्हायटिस (डोळे येणे), रांजणवाडी आणि कॉर्नियल अल्सरसारख्या समस्यांचा धोका अधिक असतो. अशा परिस्थितीत डोळ्यांचे आरोग्य जपण्यासाठी स्वच्छतेकडे विशेष लक्ष देणे आवश्यक आहे. बाहेरून आल्यानंतर किंवा कोणत्याही वस्तूला स्पर्श केल्यानंतर हात साबणाने नीट धुवावेत आणि न धुतलेल्या हातांनी डोळ्यांना स्पर्श करणे टाळावे. तसेच संसर्ग झालेल्या व्यक्तीचे टॉवेल, रुमाल, चष्मा किंवा इतर वैयक्तिक वस्तू वापरू नयेत.
पावसाचे दूषित पाणी डोळ्यांमध्ये जाणार नाही याची खबरदारी घ्यावी. दुचाकी चालवताना हेल्मेटची काच बंद ठेवणे किंवा संरक्षणात्मक चष्म्याचा वापर करणे फायदेशीर ठरते. पावसाळ्यात सार्वजनिक स्विमिंग पूलचा वापर टाळणेही सुरक्षिततेच्या दृष्टीने महत्त्वाचे आहे. कॉन्टॅक्ट लेन्स वापरणाऱ्यांनी या दिवसांत शक्यतो चष्म्याला प्राधान्य द्यावे आणि लेन्स वापरताना हात पूर्णपणे स्वच्छ ठेवावेत. याशिवाय, विटामिन ‘ए’ आणि ‘सी’युक्त आहार, पुरेशी झोप आणि चांगली रोगप्रतिकारक शक्ती संसर्गापासून बचाव करण्यास मदत करते. डोळे लाल होणे, खाज येणे किंवा सतत पाणी येणे अशी लक्षणे दिसल्यास स्वतः उपचार न करता त्वरित नेत्रतज्ज्ञांचा सल्ला घेणे आवश्यक आहे. डॉक्टरांच्या मार्गदर्शनाशिवाय कोणतेही आय ड्रॉप्स वापरणे टाळावे.
