महाराष्ट्राचे माजी उपमुख्यमंत्री दिवंगत नेते अजित पवार यांचे पुत्र जय पवार यांनी बारामती पोटनिवडणूक तसेच विमान अपघाताच्या चौकशीबाबत आपली भूमिका मांडली आहे.
बारामती पोटनिवडणुकीबाबत बोलताना त्यांनी स्पष्ट केले की, विरोधकांना निवडणूक लढवायची असल्यास ते लढू शकतात, मात्र अंतिम निर्णय बारामतीतील मतदारच घेतील. अजित पवार यांच्या अनुपस्थितीत निवडणूक होण्याबाबत त्यांनी भावनिक प्रतिक्रिया देत अशी कधी कल्पनाही केली नव्हती, असे सांगितले.
पत्रकार परिषद पुढे ढकलण्यामागील कारण स्पष्ट करताना जय पवार म्हणाले की, जे मुद्दे मांडायचे होते ते रोहित पवार यांनी आधीच मांडले आहेत. विमान अपघाताच्या चौकशीबाबत त्यांनी अंतिम अहवाल येईपर्यंत अधिक भाष्य करणार नसल्याचे सांगितले, मात्र जबाबदारी निश्चित होणे आवश्यक असल्यावर त्यांनी भर दिला.
राष्ट्रवादी काँग्रेसच्या संभाव्य विलिनीकरणाबाबत निर्णय वरिष्ठ नेत्यांवर सोपवण्यात येईल, असेही त्यांनी नमूद केले. तसेच, अजित पवार यांच्या निधनानंतर संपूर्ण पवार कुटुंब एकत्र आल्याचेही त्यांनी सांगितले.
