महाराष्ट्राच्या राजकारणात सध्या ‘विलीनीकरणा’च्या चर्चांना उधाण आले आहे. अजितदादांच्या दुर्दैवी अपघातानंतर दोन्ही राष्ट्रवादी काँग्रेस पुन्हा एकत्र येणार का, या प्रश्नाने डोकं वर काढलं आहे. दोन्ही बाजूंकडून आरोप-प्रत्यारोपांच्या फैरी झाडल्या जात असतानाच, आमदार सुनील शेळके यांनी केलेल्या एका मोठ्या विधानाने या चर्चेत नवी हवा भरली आहे. शेळके यांच्या मते, जर सुनेत्रा पवार यांचे नेतृत्व मान्य करून दोन्ही गट एकत्र येत असतील, तर तो एक आनंदाचा क्षण असेल. दादांच्या निधनानंतर निर्माण झालेली पोकळी भरून काढण्यासाठी सुनेत्रा वहिनींना ‘राष्ट्रीय अध्यक्ष’ म्हणून सन्मान मिळावा, अशी आग्रही भूमिका त्यांनी मांडली आहे.
विलीनीकरणाच्या या प्रक्रियेत सध्या अनेक अडथळे दिसत आहेत. एकीकडे मंत्र्यांच्या गळतीमुळे आणि नेत्यांमधील ‘चेकमेट’च्या खेळामुळे अंतर वाढल्याचं चित्र होतं, तर दुसरीकडे चर्चेची दारे अजूनही उघडी असल्याचा दावा अजित पवार गटातील बड्या नेत्यांकडून केला जात आहे. “चर्चा एकांगी नसावी, लोकशाहीत संवादाला महत्त्व आहे,” असे म्हणत सुनेत्रा पवारांशी चर्चा करण्याचे आवाहन करण्यात आले आहे. मुख्यमंत्री देवेंद्र फडणवीस हे अजितदादांच्या अपघाताचे सत्य बाहेर आणतील, असा विश्वास व्यक्त करतानाच, वैयक्तिक स्वार्थ बाजूला ठेवून पक्ष हितासाठी एकत्र येण्याचे संकेत शेळके यांनी दिले आहेत. आता शरद पवार गट या ‘सुनेत्रा पवार मॉडेल’वर काय भूमिका घेतो, याकडे सर्वांचे लक्ष लागले आहे.
