चंद्रपूरहून मुंबईला जाणाऱ्या कुटुंबावर ओढवला थरारक प्रसंग; भरधाव वॅगनआरचा अक्षरशः चक्काचूर
राज्यातील दळणवळण जलद आणि सोपे करणाऱ्या समृद्धी महामार्गावरील (Samruddhi Mahamarg) वेग पुन्हा एकदा प्रवाशांसाठी काळ ठरला आहे. अमरावती जिल्ह्यातील धामणगाव रेल्वे तालुक्यात समृद्धी महामार्गावर रविवारी दुपारी एक अत्यंत मन सुन्न करणारी आणि भीषण अपघाताची घटना घडली आहे. नागपूर ते मुंबई दरम्यान धावणाऱ्या या महामार्गावर वॅगनआर कार आणि ट्रक दरम्यान झालेल्या जोरदार धडकेत एकाच कुटुंबातील ५ जणांचा जागीच दुर्दैवी मृत्यू झाला आहे. मृतांमध्ये एक निष्पाप चिमुरडी, दोन महिला आणि दोन पुरुषांचा समावेश आहे. या भीषण अपघातामुळे संपूर्ण राज्यभरातून तीव्र हळहळ व्यक्त केली जात आहे.
मिळालेल्या प्राथमिक माहितीनुसार, चंद्रपूर येथील रहिवासी असलेले जीवणे कुटुंब आपल्या वॅगनआर कारने समृद्धी महामार्गावरून मुंबईच्या दिशेने निघाले होते. मात्र, प्रवास सुरू असतानाच धामणगाव रेल्वे टोलनाका परिसरातील चॅनेल नंबर १०४ आणि १०५ च्या दरम्यान कारवरील नियंत्रण सुटले. वाहनाचा वेग प्रचंड असल्याने या भरधाव कारने पुढे जाणाऱ्या एका ट्रकला (कंटेनर) मागून अत्यंत जोरदार धडक दिली. ही धडक एवढी भीषण होती की कार थेट ट्रकच्या खालच्या भागात घुसली आणि तिचा अक्षरशः चक्काचूर झाला.
अपघाताचा आवाज ऐकताच महामार्गावरील सुरक्षा पथक आणि स्थानिक पोलिसांनी तात्काळ घटनास्थळी धाव घेतली. कारचा चुराडा झाल्यामुळे आत अडकलेल्या प्रवाशांना बाहेर काढण्यासाठी बचाव पथकाला शर्थीचे प्रयत्न करावे लागले. जखमींना तातडीने रुग्णालयात नेण्याची तयारी करण्यात आली होती, परंतु धडकेची तीव्रता इतकी भयानक होती की कारमधील पाचही जणांनी जागीच प्राण सोडले होते.
समृद्धी महामार्गामुळे प्रवाशांचे तास वाचत असले, तरी येथे वाहनांच्या अवाजवी वेगामुळे सातत्याने होणारे भीषण अपघात चिंतेचा विषय ठरत आहेत. या अपघाताची नोंद घेऊन पोलिसांनी पुढील कायदेशीर तपास सुरू केला आहे. या भीषण दुर्घटनेत एका क्षणात संपूर्ण कुटुंब संपल्याने परिसरात कमालीची शांतता पसरली असून, मृतांच्या नातेवाईकांवर दुःखाचा डोंगर कोसळला आहे.
