सण-समारंभातील महागड्या साड्या डागांमुळे खराब होण्याची भीती आता विसरा; स्वयंपाकघरातील वस्तू ठरतील फायदेशीर
कोणत्याही सण-समारंभाला किंवा लग्नकार्याला जाताना सिल्क आणि बनारसी या पारंपरिक साड्या नेसल्याशिवाय महिलांचा लुक पूर्ण होत नाही. या साड्या दिसायला जितक्या देखण्या आणि भारदस्त असतात, तितकीच त्यांची काळजी घेणे देखील एक मोठे आव्हान असते. बऱ्याचदा एखाद्या कार्यक्रमात जेवताना साडीवर भाजी, तूप किंवा बटरसारख्या तेलकट पदार्थांचे डाग पडतात. अशावेळी साडी खराब होऊ नये म्हणून थेट ‘ड्रायक्लिनिंग’चा पर्याय निवडला जातो, जो प्रत्येक वेळी खिशाला परवडणारा नसतो. सिल्कचे कापड अत्यंत नाजूक असल्यामुळे त्यावर कोणताही कडक साबण किंवा ब्रश वापरल्यास साडीचा रंग फिका पडू शकतो आणि तिची ‘जर’ (Embroidery) खराब होऊ शकते. म्हणूनच, ड्रायक्लिनिंगचा महागडा खर्च टाळण्यासाठी काही सोपे आणि प्रभावी घरगुती उपाय महिलांसाठी अत्यंत उपयुक्त ठरू शकतात.
जर साडीवर तेलाचा किंवा तुपाचा डाग पडला, तर त्यावर तातडीने कॉर्नस्टार्च (मक्याचे पीठ) किंवा घरात असणारी टॅल्कम पावडर शिंपडावी. ही पावडर डाग पडलेल्या भागावर काही मिनिटे तशीच ठेवल्यास ती कपड्यातील अतिरिक्त तेल पूर्णपणे शोषून घेते; त्यानंतर मऊ कापडाने ती पावडर अलगद साफ करून घ्यावी. साडी धुण्याची वेळ आल्यास रासायनिक आणि कडक डिटर्जंटऐवजी बेबी शॅम्पूचा वापर करावा, कारण तो अत्यंत सौम्य असतो आणि त्यामुळे साडीचे नुकसान होत नाही. याशिवाय, जर साडीवर चहा, कॉफी किंवा फळांच्या रसाचे डाग असतील, तर एक कप पाण्यात एक चमचा व्हाईट व्हिनेगर मिसळून ते द्रावण कापसाच्या साहाय्याने डागावर हलक्या हाताने लावावे आणि काही वेळानंतर स्वच्छ करावे. या साध्या ट्रिक्स वापरून तुम्ही तुमच्या महागड्या साड्यांना ड्रायक्लिनिंगशिवाय घरच्या घरी नवे आणि चमकदार ठेवू शकता.
