युद्ध आणि वादाच्या बातम्यांच्या गर्दीत माणुसकीचं दर्शन; मुलीच्या पुनरागमन सोहळ्याचे अभिनेत्याकडून कौतुक
ज्येष्ठ अभिनेते राकेश बेदी सध्या त्यांच्या ‘धुरंधर’ आणि ‘धुरंधर: द रिव्हेंज’ या चित्रपटांमधील ‘जमील जमाली’ या भूमिकेमुळे प्रचंड चर्चेत आहेत. यशाच्या शिखरावर असतानाही राकेश बेदी सामाजिक विषयांवर आपली मते मांडायला विसरत नाहीत. नुकताच त्यांनी हैदराबादमधून एक व्हिडिओ शेअर केला असून, त्यात त्यांनी एका मुलीच्या जिद्दीची आणि तिच्या वडिलांच्या पाठिंब्याची हृदयस्पर्शी कथा सांगितली आहे. जगभरात सध्या इराण-इस्रायल युद्धाच्या आणि आयपीएलच्या चर्चा सुरू असताना, उत्तर प्रदेशातील एका घटनेने आपले मन जिंकल्याचे बेदी यांनी यावेळी नमूद केले.
राकेश बेदी यांनी सांगितल्यानुसार, उत्तर प्रदेशातील एका पित्याने आपल्या घटस्फोटीत मुलीचे घरी परतल्यावर चक्क बँडबाजा वाजवून आणि मिठाई वाटून स्वागत केले. समाजात घटस्फोटाकडे पाहण्याचा दृष्टिकोन नकारात्मक असताना, या पित्याने आपल्या मुलीचा आत्मविश्वास वाढवण्यासाठी दिलेली ही साथ खरोखरच कौतुकास्पद आहे. “मुलीचा घटस्फोट झाला म्हणजे तिचे आयुष्य संपले असा होत नाही. तिला पुन्हा आत्मविश्वासाने उभे राहण्यासाठी कुटुंबाच्या पाठिंब्याची गरज असते, हे या पित्याने कृतीतून दाखवून दिले आहे,” अशा शब्दांत बेदी यांनी त्या पित्याला सलाम केला.
सोशल मीडियावर हा व्हिडिओ पोस्ट करताना राकेश बेदी यांनी एक मोलाचा संदेश दिला आहे. त्यांनी लिहिले की, “घटस्फोटाला आयुष्याचा शेवट मानू नका, तर त्याला एका नवीन सुरुवातीचे माध्यम बनवा.” त्यांच्या या विचारांना नेटकऱ्यांनी मोठ्या प्रमाणात दाद दिली आहे. सध्याच्या तणावाच्या वातावरणात अशा सकारात्मक बातम्या समाजाला दिशा देणाऱ्या ठरतात, अशी भावना चाहत्यांनी व्यक्त केली आहे. चित्रपटांच्या शूटिंगमध्ये व्यस्त असतानाही राकेश बेदी यांनी व्यक्त केलेल्या या संवेदनशील मतामुळे त्यांचे सर्वत्र कौतुक होत आहे.
