मुंबई आणि महाराष्ट्रातील अनेक भागांमध्ये आज पावसाने जोरदार हजेरी लावत वातावरणात सुखद गारवा निर्माण केला. गेल्या काही दिवसांपासून वाढलेल्या उकाड्यामुळे त्रस्त झालेल्या नागरिकांना या पावसामुळे मोठा दिलासा मिळाला आहे. भारतीय हवामान विभागाने मुंबईसाठी येलो अलर्ट जारी केला असून शहरात हलक्या ते मध्यम स्वरूपाच्या पावसाची नोंद झाली आहे.
मुंबईच्या दहिसर, बोरिवली, कांदिवली, मालाड आणि गोरेगावसह अनेक उपनगरांमध्ये सकाळपासूनच पावसाच्या सरी बरसण्यास सुरुवात झाली. अचानक दाटून आलेल्या ढगांमुळे वातावरणात गारवा वाढला असून तापमानातही घट झाल्याचे जाणवत आहे. दादर, प्रभादेवी, लालबाग आणि कुर्ला परिसरातही पावसाने उपस्थिती लावली. विशेषतः कुर्ल्यात काही ठिकाणी जोरदार पाऊस पडल्याने परिसरात पावसाळी वातावरण अधिकच खुलून आले.
मुंबईपुरतेच नव्हे तर पालघर जिल्ह्यातही पावसाने दमदार आगमन केले. विजांचा कडकडाट आणि ढगांच्या गडगडाटासह झालेल्या पावसामुळे ग्रामीण भागातील वातावरण प्रसन्न झाले आहे. उष्णतेमुळे त्रस्त नागरिकांसोबतच शेतकऱ्यांनाही या पावसामुळे काहीसा दिलासा मिळाला आहे.
हवामान विभागाच्या अंदाजानुसार, राज्यातील विविध भागांत पुढील काही दिवस मान्सूनपूर्व पावसाची तीव्रता वाढण्याची शक्यता आहे. केरळमध्ये मान्सूनच्या आगमनाची प्रतीक्षा सुरू असतानाच महाराष्ट्रात पावसाळी वातावरण सक्रिय होत असल्याचे चित्र दिसत असून येत्या काळात पावसाचा जोर आणखी वाढू शकतो.
