त्वचेच्या समस्यांवर रामबाण उपाय: घरगुती घटकांपासून तयार केलेले सीरम ठरेल अधिक सुरक्षित आणि फायदेशीर
आजच्या धावपळीच्या जीवनात आणि वाढत्या प्रदूषणामुळे त्वचेच्या समस्या ही एक सामान्य बाब बनली आहे. प्रत्येकालाच आपली त्वचा चमकदार, डागविरहित आणि तजेलदार असावी असे वाटते. यासाठी सध्या बाजारामध्ये ‘व्हिटॅमिन सी सीरम’ची (Vitamin C Serum) मोठी क्रेझ पाहायला मिळत आहे. त्वचेचा रंग उजळण्यासाठी, काळे डाग घालवण्यासाठी आणि चेहऱ्यावरील टॅनिंग कमी करण्यासाठी हे सीरम अत्यंत प्रभावी मानले जाते. मात्र, बाजारात मिळणाऱ्या अनेक नामांकित ब्रँड्सच्या सीरममध्ये प्रिझर्व्हेटिव्ह्ज आणि हानिकारक केमिकल्सचा वापर केलेला असतो, ज्यामुळे संवेदनशील (Sensitive) त्वचा असलेल्या व्यक्तींना रॅशेस किंवा खाज येण्यासारख्या समस्यांना सामोरे जावे लागते. अशा वेळी महागड्या आणि केमिकलयुक्त उत्पादनांमागे धावण्यापेक्षा, तुम्ही घरच्या घरी नैसर्गिक घटकांपासून शुद्ध सीरम तयार करू शकता.
घरगुती पद्धतीने बनवलेले व्हिटॅमिन सी सीरम हे केवळ खिशाला परवडणारेच नाही, तर ते त्वचेसाठी पूर्णपणे सुरक्षित मानले जाते. यामध्ये वापरले जाणारे कोरफड जेल, गुलाबपाणी आणि व्हिटॅमिन सी पावडर त्वचेला खोलवर पोषण देतात. व्हिटॅमिन सी मधील अँटीऑक्सिडंट गुणधर्म सूर्याच्या अतिनील किरणांपासून त्वचेचे संरक्षण करतात आणि कोलेजन वाढवण्यास मदत करतात, ज्यामुळे त्वचा दीर्घकाळ तरुण आणि घट्ट राहते. विशेषतः संत्र्याच्या किंवा लिंबाच्या सालीचा वापर केल्यामुळे त्वचेला नैसर्गिक व्हिटॅमिन सी मिळते, जे बाजारातील कृत्रिम घटकांपेक्षा कितीतरी पतीने सरस ठरते.
कसे बनवाल हे घरगुती मॅजिकल सीरम?
हे सीरम बनवण्यासाठी तुम्हाला फार मोठ्या साहित्याची गरज नाही. एका स्वच्छ वाटीत २ चमचे गुलाबपाणी घ्या आणि त्यात १ चमचा व्हिटॅमिन सी पावडर (किंवा संत्र्याच्या सालीची बारीक पावडर) नीट मिसळून घ्या. हे मिश्रण एकजीव झाल्यावर त्यात १ चमचा कोरफड जेल घाला. जर तुमची त्वचा कोरडी असेल, तर तुम्ही यात ३-४ थेंब व्हिटॅमिन ई तेलाचे देखील टाकू शकता. तयार झालेले हे मिश्रण एका काचेच्या डार्क बाटलीत भरून ठेवा. रात्री झोपण्यापूर्वी चेहरा स्वच्छ धुवून या सीरमचे २-३ थेंब चेहऱ्यावर लावून हलका मसाज करा आणि त्यानंतर मॉइश्चरायझर लावा. यामुळे काही दिवसांतच तुमच्या चेहऱ्यावर नैसर्गिक ग्लो दिसून येईल. मात्र, हे वापरण्यापूर्वी कानामागच्या त्वचेवर ‘पॅच टेस्ट’ करणे विसरू नका.
