‘सेटवर माज दाखवणे म्हणजे अनप्रोफेशनलिझ्म’; कृतिकाचा थेट व्हिडिओ शेअर करत अपूर्वावर पलटवार, नेटकऱ्यांमध्ये चर्चांना उधाण
मराठी दूरचित्रवाणी विश्वातील गाजलेली मालिका ‘रात्रीस खेळ चाले’ या मालिकेतील ‘शेवंता’ या लोकप्रिय भूमिकेवरून आता दोन अभिनेत्रींमध्ये जोरदार वाद पेटला आहे. काही काळापूर्वी अभिनेत्री अपूर्वा नेमळेकरने काही कारणांमुळे ही मालिका अचानक सोडली होती, ज्यानंतर तिच्या जागी अभिनेत्री कृतिका तुळस्करची वर्णी लागली. नुकत्याच झालेल्या एका पॉडकास्ट मुलाखतीत अपूर्वाने कृतिकावर ‘अनप्रोफेशनल’ (व्यावसायिक शिस्त नसलेली) असल्याचा आरोप केला होता. या गंभीर आरोपाला अत्यंत आक्रमक आणि सडेतोड उत्तर देण्यासाठी कृतिका तुळस्करने आपल्या इन्स्टाग्राम अकाऊंटवर एक व्हिडिओ पोस्ट केला आहे. “मी नेहमी माझ्या कामालाच बोलू दिले आहे. ज्यांनी प्रत्यक्षात माझ्यासोबत काम केले, त्यांनाच माझ्या व्यावसायिकतेबद्दल बोलण्याचा अधिकार आहे; बाकी लोकांचे मत हे फक्त एक मत असते,” अशा कडक कॅप्शनसह तिने अपूर्वाचा चांगलाच समाचार घेतला आहे.
कृतिकाने व्हिडिओच्या सुरुवातीलाच उपरोधिकपणे म्हटले की, “होय, ‘रात्रीस खेळ चाले’ या मालिकेची सोकॉल्ड अनप्रोफेशनल अभिनेत्री मीच आहे. माझ्याआधी ही भूमिका साकारणाऱ्या अभिनेत्रीचे म्हणणे आहे की मी अनप्रोफेशनल आहे, पण तिला मी हे सांगू इच्छिते की खरा अनप्रोफेशनलिझ्म काय असतो? सेटवर वेळेत न येणे, दिग्दर्शकाला ताटकळत ठेवणे, सहकलाकार आणि निर्मात्यांशी उद्धटपणे वागणे, आणि केवळ माझ्यामुळेच मालिकेचा टीआरपी वाढतोय असा माज सगळ्यांना दाखवणे, याला खरा अनप्रोफेशनलिझ्म म्हणतात.” एवढ्यावरच न थांबता कृतिकाने अपूर्वाच्या मालिका सोडण्यावरही बोट ठेवत म्हटले की, एखादा निर्माता जेव्हा लाखो रुपये खर्च करतो, तेव्हा इतर तंत्रज्ञ आणि कलाकारांच्या पोटापाण्याचा विचार न करता मालिका अर्धवट सोडून जाणे हाच सर्वात मोठा बेजबाबदारपणा आहे, तर दुसरीकडे कोणत्याही बॅकग्राउंडशिवाय एका रात्रीत भूमिकेसाठी उभे राहून तिला न्याय देणे याला प्रोफेशनलिझ्म म्हणतात.
अपूर्वाने आपल्या मुलाखतीत कृतिकाकडून एका फोनची अपेक्षा व्यक्त केली होती, त्या मुद्द्याचाही कृतिकाने समाचार घेतला. ती म्हणाली, “मी तिला फोन का करायला हवा होता? आमची अशी कोणती जुनी ओळख किंवा मैत्री आहे का? एक अभिनेत्री म्हणून माझ्याकडे जेव्हा एखादी उत्तम संधी चालून आली, तेव्हा मी त्याचे सोनं कसे करायचे याचा विचार करणार की तिला फोन करून ‘तू मालिका का सोडलीस की तुला काढले गेले?’ हे विचारत बसणार? मी माझं काम शंभर टक्के प्रामाणिकपणे केले आहे आणि मी कोणालाही स्पष्टीकरण देण्यास बांधील नाही.” आम्ही कधी एकत्र कामच केले नसल्यामुळे मी सेटवर कशी वागते हे तिला ठाऊक नाही, त्यामुळे यापुढे माझ्याबद्दल कोणत्याही माध्यमात बोलताना विचार करून बोलावे, असा थेट इशाराच कृतिकाने दिला आहे. सध्या या दोन्ही अभिनेत्रींमधील हा ‘शेवंता’ वाद सोशल मीडियावर तुफान व्हायरल होत असून नेटकरी यावर वेगवेगळ्या प्रतिक्रिया देत आहेत.
