“आता सरळ उभे राहिले तरी खूप दुखते…”; आई-वडिलांच्या निधनानंतर खऱ्या आयुष्यातही कठीण प्रसंगाचा सामना करत आहे ‘तारक मेहता…’चा लाडका स्टार
‘तारक मेहता का उल्टा चष्मा’ ही मालिका गेल्या अनेक दशकांपासून प्रेक्षकांच्या गळ्यातील ताईत बनली आहे. या मालिकेतील प्रत्येक पात्राने रसिकांच्या मनावर एक वेगळीच छाप सोडली आहे. असेच एक लोकप्रिय आणि सर्वांचे लाडके पात्र म्हणजे जेठालालच्या दुकानातील इमानी नोकर ‘बाघा’. बाघाची ती वाकलेली कंबर, त्याचे खांदे आणि चालण्याची अतरंगी स्टाईल पाहून आजवर आपण सगळेच खळखळून हसलो आहोत. मात्र, प्रेक्षकांना हसवणाऱ्या या प्रसिद्ध देहबोलीसाठी (Body Language) अभिनेता तन्मय वेकारिया याला खऱ्या आयुष्यात खूप मोठी आणि वेदनादायी शारीरिक किंमत चुकवावी लागत आहे. तन्मयला आता गंभीर पाठदुखीच्या समस्येने ग्रासले असून, त्याला सरळ उभे राहणेही कठीण झाले आहे.
‘टेलीचक्कर’ला दिलेल्या एका ताज्या मुलाखतीत तन्मयने त्याच्या या शारीरिक त्रासाबद्दल अत्यंत मोकळेपणाने भाष्य केले. तो म्हणाला “इतकी वर्षे सतत कंबर वाकवून आणि एका विशिष्ट अवस्थेत तासनतास शूटिंग केल्यामुळे आता माझ्या पाठीवर आणि मणक्यावर प्रचंड दबाव आला आहे. परिस्थिती अशी आहे की, आता मी सामान्य माणसासारखा सरळ उभा राहिलो, तरी माझी पाठ खूप तीव्रतेने दुखते. पण, तरीही मला बाघाची भूमिका करायला प्रचंड आवडते. एकदा का मी सेटवर गेलो आणि बाघाच्या कपड्यांमध्ये शिरलो, की मी माझ्या सर्व वेदना विसरून जातो. तिथले सकारात्मक वातावरण मला ऊर्जा देते.”
सेटवर सगळ्यांना हसवणारा तन्मय सध्या खऱ्या आयुष्यात अत्यंत कठीण आणि भावनिक प्रसंगातून जात आहे. गेल्या काही महिन्यांतच त्याच्यावर दुःखाचा डोंगर कोसळला आहे. नुकतेच त्याचे वडील आणि प्रसिद्ध गुजराती रंगभूमी अभिनेते अरविंद वेकारिया यांचे निधन झाले. तर त्यापूर्वी गेल्या वर्षी ऑक्टोबरमध्ये त्याच्या आईनेही जगाचा निरोप घेतला होता.
तन्मयची आई त्याच्या ‘बाघा’ या पात्राची सर्वात मोठी चाहती होती. आपल्या मुलाला टीव्हीवर पाहण्यात त्यांना प्रचंड आनंद मिळायचा. आईच्या निधनानंतर सेटवर शूटिंग करत असताना, “माझे नवीन एपिसोड्स पाहायला आता आई या जगात नाही,” या विचाराने तन्मयला सेटवरच रडू कोसळले होते आणि काही काळासाठी शूटिंग थांबवावे लागले होते.
तन्मय वेकारियाने सांगितले की, ‘तारक मेहता…’ या मालिकेत येण्यापूर्वी त्याने अनेक लहान-मोठ्या भूमिका केल्या होत्या. वास्तविक पाहता, त्याला या मालिकेत एका ‘पोलीस इन्स्पेक्टर’ची भूमिका मिळणार होती आणि तो त्यासाठी तयारही होता. मात्र, सेटवरील एका क्रू मेंबरने (सोहिल भाई) त्याला पोलीस न बनता ‘बाघा’ या नवीन पात्रासाठी ऑडिशन देण्याचा सल्ला दिला. तन्मयने ऑडिशन दिली, त्याची निवड झाली आणि तिथून सुरू झालेला हा प्रवास आजही प्रेक्षकांचे अविरत मनोरंजन करत आहे.
