आजच्या वेगवान आणि धकाधकीच्या जीवनशैलीत अनेक महिला करिअर, आर्थिक स्थैर्य आणि वैयक्तिक प्रगतीला प्राधान्य देताना मातृत्वाचा निर्णय पुढे ढकलतात. मात्र, याच काळात प्रजनन आरोग्याकडे दुर्लक्ष होण्याची शक्यता वाढते. त्यामुळे भविष्यात गर्भधारणेचा विचार असल्यास आधीच आरोग्य तपासण्या करून घेणे अत्यंत गरजेचे ठरते. या संदर्भात एएमएच चाचणी विशेष महत्त्वाची मानली जाते.
तज्ज्ञांच्या मते, ही एक साधी रक्त तपासणी असून ती महिलांच्या अंडाशयातील अंड्यांचा साठा, म्हणजेच ‘ओव्हेरियन रिझर्व्ह’, याची माहिती देते. या चाचणीसाठी मासिक पाळीच्या विशिष्ट दिवसाची आवश्यकता नसते, त्यामुळे ती कधीही करता येते. एएमएचचे प्रमाण कमी असल्यास भविष्यात प्रजननक्षमतेचा कालावधी मर्यादित असू शकतो, असे सूचित होते. मात्र, याचा अर्थ गर्भधारणा अशक्य आहे असा होत नाही. उलट, जास्त एएमएच पातळी चांगल्या अंड्यांच्या साठ्याचे संकेत देते.
ही चाचणी विशेषतः गर्भधारणेचा प्रयत्न करणाऱ्या किंवा त्यात अडचणी येणाऱ्या महिलांसाठी उपयुक्त आहे. तसेच पॉलिसिस्टिक ओव्हरी सिंड्रोम, अनियमित मासिक पाळी किंवा लवकर रजोनिवृत्तीचा इतिहास असलेल्या महिलांनी ही तपासणी करून घेणे फायदेशीर ठरते. काही वेळा डॉक्टर इतर हार्मोन तपासण्या जसे की FSH, LH यांसह अँट्रल फॉलिकल काउंट करण्याचाही सल्ला देतात. एकूणच, एएमएच चाचणीमुळे महिलांना त्यांच्या प्रजनन आरोग्याबाबत स्पष्ट कल्पना मिळते. योग्य वेळी सल्ला आणि जीवनशैलीत बदल केल्यास निरोगी गर्भधारणा साध्य होऊ शकते. संतुलित आहार, नियमित व्यायाम, तणाव नियंत्रण आणि वाईट सवयी टाळणे याकडे लक्ष देणेही तितकेच आवश्यक आहे.
