इंडेन, भारत आणि एचपी गॅसच्या ग्राहकांसाठी महत्त्वाचे आदेश; दुर्लक्ष केल्यास गॅस पुरवठा होणार खंडित.
जर तुम्ही घरगुती वापरासाठी लिक्विफाइड पेट्रोलियम गॅस (LPG) म्हणजेच गॅस सिलेंडर वापरत असाल, तर केंद्र सरकारचा एक अत्यंत महत्त्वाचा नियम तुमच्यासाठी लागू झाला आहे. केंद्र सरकारने नुकताच ‘एलपीजी सुधारणा आदेश, २०२६’ जारी केला आहे. या नवीन नियमांनुसार, ज्या कुटुंबांकडे पाईपद्वारे नैसर्गिक वायू म्हणजेच पीएनजी (PNG) चे कनेक्शन उपलब्ध आहे, त्यांना ३० दिवसांच्या आत आपले जुने एलपीजी (LPG) कनेक्शन तेल कंपन्यांकडे परत करणे बंधनकारक करण्यात आले आहे. हा नियम इंडेन (Indane), भारत गॅस (BharatGas) आणि एचपी गॅस (HP Gas) या तिन्ही प्रमुख कंपन्यांच्या ग्राहकांना लागू असेल.
या नवीन ‘वन हाऊसहोल्ड, वन गॅस कनेक्शन’ (एक घर, एक गॅस) धोरणाचा मुख्य उद्देश शहरातील दुहेरी गॅस कनेक्शन बंद करणे हा आहे. यामुळे गॅस सिलेंडरचा होणारा काळाबाजार रोखता येईल, तसेच ज्या ग्रामीण आणि निमशहरी भागांमध्ये अद्याप पाईप गॅसचे नेटवर्क पोहोचलेले नाही, तिथे सिलेंडरचा पुरवठा वाढवता येईल. उदाहरणासह सांगायचे तर, जर एखाद्या ग्राहकाने १ जून रोजी नवीन पीएनजी कनेक्शन सुरू केले असेल, तर त्यांना १ जुलैपर्यंत आपले एलपीजी खाते अधिकृतपणे बंद करावे लागेल. दिलेल्या ३० दिवसांच्या मुदतीत जर खाते बंद केले नाही, तर तेल कंपन्यांकडून एलपीजी रिफिलिंग पूर्णपणे थांबवले जाईल आणि कनेक्शन रद्द केले जाऊ शकते. सध्या ओएमसी (OMCs) म्हणजेच तेल विपणन कंपन्या अशा दुहेरी कनेक्शन असणाऱ्या ग्राहकांना शोधण्यासाठी त्यांचा डेटाबेस सक्रियपणे स्कॅन करत आहेत.
नोकरी, व्यवसाय किंवा शिक्षणासाठी एका शहरातून दुसऱ्या शहरात सतत स्थलांतर करणाऱ्या भाडेकरू, विद्यार्थी आणि कर्मचाऱ्यांसाठी सरकारने या नियमात एक दिलासादायक तरतूदही केली आहे. अशा ग्राहकांना त्यांचे एलपीजी कनेक्शन सरेंडर केल्यानंतर गॅस एजन्सीकडून एक ‘ट्रान्सफर व्हाउचर’ (Transfer Voucher) दिले जाईल. भविष्यात जर हे लोक अशा भागात राहायला गेले जिथे पाईप गॅस (PNG) ची सोय नाही, तर याच व्हाउचरच्या आधारे त्यांना पुन्हा नवीन एलपीजी सिलेंडर कनेक्शन अगदी सहज आणि प्राधान्याने मिळू शकेल. त्यामुळे त्यांची गॅस गमावण्याची चिंता मिटली आहे. याशिवाय, शहरी व ग्रामीण भागातील नेहमीच्या एलपीजी ग्राहकांसाठीचे सिलेंडर बुकिंगचे अंतर अनुक्रमे २५ दिवस आणि ४५ दिवस असेच कायम ठेवण्यात आले आहे.
सुरक्षेच्या दृष्टीने आणि पारदर्शकता आणण्यासाठी सरकारने डिलिव्हरीच्या नियमातही बदल केला आहे. आता गॅस सिलेंडर घरपोच मिळण्यापूर्वी ग्राहकांना त्यांच्या नोंदणीकृत मोबाईल क्रमांकावर आलेला एक वैध वन-टाइम पासवर्ड (OTP) डिलिव्हरी बॉयला देणे अनिवार्य असेल. हा ओटीपी अचूक असल्यावरच सिलेंडर सुपूर्द केला जाईल, ज्यामुळे घरगुती सिलेंडरच्या व्यावसायिक गैरवापराला पूर्णपणे लगाम बसेल. जर तुमच्याकडेही दोन्ही कनेक्शन असतील, तर कोणत्याही दंडात्मक कारवाईपासून वाचण्यासाठी तातडीने आपल्या गॅस वितरकांशी संपर्क साधून एलपीजी सरेंडर करण्याची प्रक्रिया पूर्ण करून घ्यावी.
