कल्याण-डोंबिवलीतील शास्त्रीनगर रुग्णालयात घडलेल्या एका घटनेने राज्यभरात मोठी चर्चा निर्माण केली आहे. प्रसूतीसाठी दाखल झालेल्या एका महिला रुग्णाच्या उपचारादरम्यान झालेल्या वादानंतर डॉक्टर आणि परिचारिकांशी गैरवर्तन झाल्याचा आरोप करण्यात आला आहे. या प्रकरणात शिंदे सेनेचे नगरसेवक रमेश म्हात्रे आणि त्यांच्या काही कार्यकर्त्यांची नावे समोर आली असून, घटनेचा व्हिडिओ सोशल मीडियावर व्हायरल झाल्यानंतर वाद अधिकच चिघळला आहे.
या घटनेनंतर वैद्यकीय कर्मचाऱ्यांच्या सुरक्षेचा मुद्दा पुन्हा एकदा चर्चेत आला आहे. डॉक्टर आणि आरोग्य कर्मचाऱ्यांवरील वाढत्या हल्ल्यांबाबत विविध स्तरातून चिंता व्यक्त केली जात असतानाच, खासदार डॉ. श्रीकांत शिंदे यांनी या प्रकरणाची गंभीर दखल घेतली आहे.
डॉ. श्रीकांत शिंदे यांनी स्पष्ट शब्दांत सांगितले की, कायदा हातात घेणाऱ्या कोणालाही पाठीशी घातले जाणार नाही. या प्रकरणात संबंधितांविरोधात गुन्हा दाखल करण्यात आला असून, कायद्यानुसार योग्य ती कारवाई केली जाईल. याशिवाय, घटनेत सहभागी असलेल्या पक्षाच्या पदाधिकारी किंवा कार्यकर्त्यांवर पक्षांतर्गत शिस्तभंगाची कारवाईही केली जाणार असल्याचे त्यांनी स्पष्ट केले.
सोशल मीडिया प्लॅटफॉर्म X वरील आपल्या पोस्टमध्ये त्यांनी डॉक्टर, परिचारिका आणि आरोग्य कर्मचारी हे दिवस-रात्र जनतेच्या सेवेसाठी कार्यरत असतात, त्यामुळे त्यांच्या सुरक्षिततेचा आणि सन्मानाचा आदर राखणे ही प्रत्येकाची जबाबदारी असल्याचे नमूद केले. स्वतः डॉक्टर असल्याने आरोग्य कर्मचाऱ्यांच्या अडचणी आणि जबाबदाऱ्यांची जाणीव असल्याचेही त्यांनी सांगितले.
या घटनेचा तपास सुरू असून, पुढील चौकशीनंतर संबंधितांवर कायदेशीर आणि प्रशासकीय पातळीवर कोणती कारवाई होते, याकडे सर्वांचे लक्ष लागले आहे.
