राज्यात मान्सूनने दमदार हजेरी लावल्यानंतर अनेक भागांतील निसर्ग पुन्हा एकदा बहरून आला आहे. गेल्या काही दिवसांपासून सुरू असलेल्या मुसळधार पावसामुळे कोरडे पडलेले अनेक धबधबे पुन्हा प्रवाहित झाले असून, पर्यटकांची पावले निसर्गरम्य स्थळांकडे वळू लागली आहेत. अशातच छत्रपती संभाजीनगर जिल्ह्यातील जागतिक वारसा स्थळ म्हणून प्रसिद्ध असलेल्या अजिंठा लेणी परिसरातील सप्तकुंड धबधबा सध्या पूर्ण क्षमतेने वाहताना दिसत आहे.
उंच डोंगरकड्यांवरून कोसळणाऱ्या पांढऱ्याशुभ्र पाण्याच्या धारा आणि त्याभोवती पसरलेली गर्द हिरवाई हे दृश्य पर्यटकांना अक्षरशः मंत्रमुग्ध करत आहे. पावसामुळे संपूर्ण परिसर धुक्याच्या चादरीत लपेटला गेला असून, निसर्गाने जणू हिरवागार शालू परिधान केल्याचे मनमोहक चित्र पाहायला मिळत आहे.
अजिंठा लेणी आणि सप्तकुंड धबधब्याचे विहंगम दृश्य टिपण्यासाठी पर्यटक आणि निसर्गप्रेमी मोठ्या संख्येने येथे भेट देत आहेत. या नयनरम्य परिसराचे व्हिडिओ आणि छायाचित्रे सोशल मीडियावरही मोठ्या प्रमाणात व्हायरल होत असून, अनेक जण या सौंदर्याचे कौतुक करत आहेत.
मात्र, पावसामुळे धबधब्याचा प्रवाह वेगवान झाला असल्याने प्रशासनाने नागरिकांना आणि पर्यटकांना सावधगिरी बाळगण्याचे आवाहन केले आहे. धबधब्याजवळ सेल्फी किंवा धोकादायक ठिकाणी जाणे टाळावे, तसेच प्रशासनाच्या सूचनांचे पालन करून सुरक्षितपणे निसर्गाचा आनंद घ्यावा, असे आवाहन करण्यात आले आहे.
मान्सूनच्या आगमनाने अजिंठा परिसर पुन्हा एकदा पर्यटकांसाठी आकर्षणाचे केंद्र बनला असून, येत्या काही दिवसांत येथे पर्यटकांची संख्या आणखी वाढण्याची शक्यता व्यक्त केली जात आहे.
