मुंबईतील घाटकोपर परिसरातील सागर पार्क सोसायटीमध्ये बकरा कुर्बानीच्या मुद्द्यावरून वातावरण तापल्याचे चित्र पाहायला मिळत आहे. मीरा रोडमधील वादानंतर आता घाटकोपरमध्येही अशाच प्रकारचा तणाव निर्माण झाल्याने प्रशासन सतर्क झाले आहे. परिसरात मोठ्या प्रमाणात पोलीस बंदोबस्त तैनात करण्यात आला असून कोणताही अनुचित प्रकार घडू नये यासाठी परिस्थितीवर बारकाईने नजर ठेवली जात आहे.
मिळालेल्या माहितीनुसार, कुर्बानीसाठी सोसायटी परिसरात मोठ्या संख्येने बकरे आणण्यात आले होते. याच मुद्द्यावरून स्थानिकांमध्ये नाराजी निर्माण झाली आणि काही नागरिकांनी याला विरोध दर्शवला. या वादानंतर मुंबई महानगरपालिकेने कारवाई करत परिसरातील अनेक बोकड ताब्यात घेतल्याची माहिती समोर आली आहे. प्रशासनाकडून कुर्बानीसाठी पर्यायी जागा उपलब्ध करून देण्याची प्रक्रिया सुरू असल्याचेही सांगितले जात आहे.
दरम्यान, भाजप नेते किरीट सोमय्या यांनी घटनास्थळी जाऊन या प्रकरणावर तीव्र प्रतिक्रिया व्यक्त केली. सागर पार्क सोसायटीमध्ये यापुढे कुर्बानी होऊ दिली जाणार नसल्याचा इशारा त्यांनी दिला. तसेच, नागरिकांच्या भावना लक्षात घेऊन प्रशासनाने निर्णय घ्यावा, अशी मागणीही त्यांनी केली. कायदा आणि सुव्यवस्था राखण्याची जबाबदारी पोलिसांची असल्याचे सांगत त्यांनी प्रशासनावरही अप्रत्यक्ष टीका केली.
या संपूर्ण घडामोडींमुळे घाटकोपर परिसरात काही काळ तणावपूर्ण वातावरण निर्माण झाले होते. पोलिसांनी मात्र परिस्थिती नियंत्रणात असल्याचे स्पष्ट केले असून नागरिकांना अफवांवर विश्वास न ठेवण्याचे आवाहन करण्यात आले आहे. सणाच्या पार्श्वभूमीवर सामाजिक सलोखा टिकवून ठेवणे आवश्यक असल्याचे मत अनेकांकडून व्यक्त केले जात आहे. प्रशासन, पोलीस आणि स्थानिक प्रतिनिधी यांच्या समन्वयातून परिस्थिती शांततेत हाताळण्याचा प्रयत्न सुरू आहे.
