पुण्यात संत ज्ञानेश्वर महाराज आणि संत तुकाराम महाराज यांच्या पालखी सोहळ्यात सहभागी झालेल्या वारकऱ्यांना चोरट्यांनी लक्ष्य केल्याच्या घटना समोर आल्याने भाविकांमध्ये चिंतेचे वातावरण निर्माण झाले आहे. लाखो वारकरी दर्शन आणि पालखी सोहळ्यासाठी पुण्यात दाखल झाल्याने अनेक ठिकाणी मोठी गर्दी झाली होती. याच गर्दीचा फायदा घेत काही अज्ञात चोरट्यांनी अत्यंत चलाखीने वारकऱ्यांच्या वस्तूंवर डल्ला मारल्याचा आरोप आहे. प्राथमिक माहितीनुसार, काही वारकऱ्यांच्या अंगावर खाज निर्माण करणारी पावडर टाकून त्यांचे लक्ष दुसरीकडे वळवण्यात आले. त्यानंतर गोंधळाच्या परिस्थितीत काहींच्या चेहऱ्यावर साबण फासून त्यांना अधिक गोंधळात टाकण्यात आले आणि त्याच संधीचा फायदा घेत मोबाईल फोन तसेच रोख रक्कम चोरी करण्यात आल्याचे सांगितले जात आहे. या प्रकारात एका वारकऱ्याचा मोबाईल आणि सुमारे पाच हजार रुपयांची रोकड चोरीला गेल्याची माहिती समोर आली आहे. मोबाईल हरवल्यामुळे संबंधित वारकरी भावुक झाल्याचेही पाहायला मिळाले.
या घटनांमुळे पालखी सोहळ्यातील सुरक्षेचा मुद्दा पुन्हा एकदा चर्चेत आला आहे. पोलिसांना या चोरींची माहिती देण्यात आली असून, सीसीटीव्ही फुटेज आणि इतर पुराव्यांच्या आधारे संशयितांचा शोध सुरू आहे. प्रशासनाने वारकऱ्यांना गर्दीच्या ठिकाणी सतर्क राहण्याचे, मौल्यवान वस्तू सुरक्षित ठेवण्याचे आणि कोणतीही संशयास्पद हालचाल आढळल्यास तातडीने पोलिसांना कळवण्याचे आवाहन केले आहे. दरम्यान, या घटनांमुळे पालखी सोहळ्याच्या उत्साहावर काही प्रमाणात विरजण पडले असले, तरी भाविकांनी संयम राखून सहकार्य करण्याचे आवाहनही करण्यात आले आहे.
