सर्वोच्च न्यायालयात सुरू असलेल्या एका सुनावणीदरम्यान अभूतपूर्व गोंधळ उडाल्याची घटना समोर आली आहे. अलाहाबाद उच्च न्यायालयाच्या एका निर्णयाला आव्हान देणाऱ्या याचिकेवर सुनावणी सुरू असताना याचिकाकर्त्याच्या वकिलाने न्यायालयातच आक्रमक भूमिका घेत शिवीगाळ केली आणि संतापाच्या भरात केसशी संबंधित फाईल न्यायालयात फेकून दिली. त्या वेळी खंडपीठावर न्यायमूर्ती के. व्ही. विश्वनाथन आणि न्यायमूर्ती आलोक आराधे उपस्थित होते, तर सरन्यायाधीश सूर्यकांत न्यायालयात उपस्थित नव्हते. सुनावणीच्या सुरुवातीलाच संबंधित वकिलाने न्यायालयालाच एका पोलिस अधिकाऱ्याविरुद्ध एफआयआर दाखल करण्याचे आदेश देण्याची भाषा वापरली. यावर न्यायमूर्ती विश्वनाथन यांनी आश्चर्य व्यक्त करत त्यांना न्यायालयाला आदेश देत आहात का, असा सवाल केला. त्यानंतर वकिलाने संताप व्यक्त करत शिवीगाळ सुरू केली आणि फाईल हवेत भिरकावली. या अनपेक्षित प्रकारामुळे न्यायालयात काही काळ तणावपूर्ण वातावरण निर्माण झाले. सुरक्षारक्षकांनी तत्काळ हस्तक्षेप करून संबंधित वकिलाला न्यायालयाबाहेर नेले. या घटनेनंतर न्यायमूर्ती विश्वनाथन यांनी संबंधित वकील मानसिक तणावाखाली आणि निराश असल्याचे दिसत असल्याचे नमूद करत त्याच्याविरोधात कठोर कारवाईची इच्छा नसल्याचे सांगितले.
मात्र, याचिकेतील मुद्द्यांमध्ये हस्तक्षेप करण्यासाठी कोणताही ठोस आधार नसल्याने न्यायालयाने दिलासा देण्यास नकार दिला. दरम्यान, या गैरवर्तनाची गंभीर दखल घेत बार कौन्सिल संबंधित वकिलाविरोधात शिस्तभंगाची कारवाई करू शकते. दोष सिद्ध झाल्यास ताकीद, काही काळासाठी वकिलीवर बंदी किंवा गंभीर प्रकरणात बार कौन्सिलच्या नोंदणीतून नाव वगळण्यासारखी कठोर कारवाईही होऊ शकते.
