इंग्लंडच्या ‘मॅचविनर’मुळे रोहितच्या अनुपस्थितीत मुंबईची ताकद दुप्पट!
आयपीएल २०२६ च्या रणांगणात सुरुवातीच्या धक्क्यांनंतर मुंबई इंडियन्सने फिनिक्स भरारी घेतली आहे. सलग चार पराभवांची मालिका मोडून काढत मुंबईने सोमवारी गुजरात टायटन्सचा त्यांच्याच बालेकिल्ल्यात, म्हणजेच अहमदाबादमध्ये ९९ धावांनी धुव्वा उडवला. या ऐतिहासिक विजयानंतर आता मुंबईचा पुढचा मुक्काम मायदेशात, म्हणजेच वानखेडे स्टेडियमवर असणार आहे. येत्या सामन्यात मुंबईचा सामना कट्टर प्रतिस्पर्धी चेन्नई सुपर किंग्सशी होणार आहे. या ‘एल-क्लासिको’ सामन्यापूर्वी मुंबईच्या चाहत्यांसाठी एक मोठी आणि आनंदाची बातमी समोर आली आहे.
मिळालेल्या माहितीनुसार, इंग्लंडचा अष्टपैलू खेळाडू विल जॅक्स मुंबई इंडियन्सच्या ताफ्यात सामील झाला आहे. विल जॅक्सने वानखेडेवर मुंबईच्या खेळाडूंसोबत सराव केल्याचे वृत्त समोर आल्याने चेन्नईविरुद्ध तो मैदानात उतरण्याची दाट शक्यता आहे. विल जॅक्स हा केवळ आक्रमक फलंदाजच नाही, तर तो फिरकी गोलंदाजीमध्येही वाकबगार आहे. विशेष म्हणजे, नुकत्याच झालेल्या टी-२० विश्वचषक २०२६ मध्ये त्याने इंग्लंडकडून खेळताना ८ सामन्यांत २२६ धावा आणि ९ विकेट्स घेत अष्टपैलू कामगिरीचे दर्शन घडवले होते. त्यामुळे त्याच्या समावेशामुळे मुंबईची फलंदाजी आणि गोलंदाजी अशा दोन्ही बाजू भक्कम झाल्या आहेत.
रोहित शर्माच्या अनुपस्थितीत मुंबईला सलामीच्या जोडीची चिंता सतावत होती. गुजरातविरुद्ध पदार्पण करणाऱ्या दानिश मालेवारला विशेष छाप पाडता आली नाही, त्यामुळे चेन्नईविरुद्ध विल जॅक्स क्विंटन डी कॉकसोबत डावाची सुरुवात करताना दिसू शकतो. हार्दिक पांड्याच्या नेतृत्वाखालील मुंबई संघाने आपला विजयाचा रथ आता रुळावर आणला असून, विल जॅक्सच्या एन्ट्रीने चेन्नईच्या गोटात नक्कीच चिंतेचे वातावरण निर्माण झाले असणार. वानखेडेवर होणारा हा सामना मुंबईसाठी प्ले-ऑफच्या दिशेने महत्त्वाचे पाऊल ठरणार आहे.
