“६ वर्षांपासून पूर्वजांच्या जमिनींवर चिनी सैन्याची घुसखोरी…” – ‘नाह वेल्फेअर सोसायटी’च्या गंभीर आरोपांमुळे भारत-चीन सीमेवर पुन्हा तणाव वाढण्याची शक्यता!
भारत आणि चीन यांच्यातील सीमावादाची ठसठसती जखम पुन्हा एकदा चर्चेत आली आहे. काही काळापूर्वी दोन्ही देशांच्या सैनिकांमध्ये प्रत्यक्ष नियंत्रण रेषेवर (LAC) झालेल्या हिंसक झडपेचे थरारक व्हिडिओ समोर आले होते, ज्यामध्ये सैनिकांना नदीत फेकण्यापासून ते एकमेकांवर दगडफेक करण्यापर्यंतचे प्रकार घडले होते. हा तणाव निवळत नाही तोच, आता भारताच्या पूर्वेकडील अत्यंत संवेदनशील असलेल्या अरुणाचल प्रदेशच्या सीमेवरून एक अत्यंत चिंताजनक आणि खळबळजनक वृत्त समोर येत आहे. चीनच्या पीपल्स लिब्रेशन आर्मीने (PLA) भारतीय हद्दीत घुसखोरी करून स्थानिक जमिनीवर बेकायदेशीर ताबा मिळवण्यास सुरुवात केल्याचा आरोप केला जात आहे.
अरुणाचल प्रदेशच्या सुबनसिरी जिल्ह्यातील ‘ताक्सिंग’ या दुर्गम सीमावर्ती भागात राहणाऱ्या स्थानिक ‘नाह’ (Nah) आदिवासी समुदायाने हा खळबळजनक दावा केला आहे. आदिवासी हितरक्षक संघटना ‘नाह वेल्फेअर सोसायटी’ने (NWS) थेट जिल्हा प्रशासनाला या गंभीर परिस्थितीची लेखी माहिती दिली आहे. टाइम्स ऑफ इंडियाच्या अहवालानुसार, संघटनेचे अध्यक्ष केरू चादर यांनी सांगितले की, गेल्या ६ वर्षांत चिनी सैन्याने त्यांच्या पूर्वजांच्या पारंपरिक जमिनींवर, जिथे त्यांचे लोक शिकार आणि पशुपालन करायचे, त्यावर मोठ्या प्रमाणावर अतिक्रमण केले आहे. वास्तविक पाहता, चिनी सैन्याची ही संथ गतीने चालणारी घुसखोरी गेल्या १० ते १५ वर्षांपासून सुरू आहे, परंतु २०२० सालापासून त्यांनी अत्यंत आक्रमकपणे भारतीय जमिनी गिळंकृत करण्याचा सपाटा लावला आहे.
स्थानिक आदिवासी नेत्यांनी स्पष्ट केले की, त्यांचा भारतीय लष्कराच्या शौर्यावर आणि कर्तव्यावर पूर्ण विश्वास आहे आणि आपले सैनिक प्राणा पणाने देशाचे रक्षण करत आहेत. मात्र, चिनी सैन्याचा ताक्सिंग क्षेत्रातील पुढे सरकण्याचा वेग अतिशय वेगवान आणि चिंताजनक आहे. आपली हक्काची जमीन दिवसेंदिवस इंच-इंच करून चीनच्या ताब्यात जात असल्याचे सांगत त्यांनी प्रशासनाकडे तातडीने हस्तक्षेपाची मागणी केली आहे. धक्कादायक बाब म्हणजे, या बळकावलेल्या भारतीय जमिनीवर चीनने पक्के रस्ते, पूल आणि लष्करी छावण्या (Camps) देखील उभारल्या आहेत.
अरुणाचल प्रदेश हा भारताचा अविभाज्य भाग असला तरी चीन नेहमीच या क्षेत्रावर आपला अवाजवी दावा सांगत आला आहे. चीन अनेकदा अरुणाचलमधील गावांची नावे बदलून ती स्वतःच्या नकाशात दाखवण्याचा उद्दामपणा करतो. अशातच आता स्थानिक पातळीवरून थेट जमिनीवर कब्जा केल्याचे पुरावे समोर आल्याने सुरक्षा यंत्रणांच्या पातळीवर मोठी खळबळ उडाली आहे. आता ड्रॅगनच्या या विस्तारवादी आणि छुप्या खेळीला भारतीय सैन्य कशा प्रकारे चोख प्रत्युत्तर देते, याकडे संपूर्ण देशाचे लक्ष लागले असून यामुळे दोन्ही देशांमधील द्विपक्षीय तणाव आणखी टोकाला जाण्याची चिन्हे आहेत.
