इडलीपासून उकडीच्या मोदकांपर्यंत… आरोग्य, सण आणि परंपरेचा मिलाफ ठरला यंदाचा फूड ट्रेंड
2025 हे वर्ष इंटरनेटवर केवळ मनोरंजन किंवा तंत्रज्ञानापुरते मर्यादित राहिले नाही, तर खाद्यसंस्कृतीचाही मोठा उत्सव ठरले. गुगलने जाहीर केलेल्या ‘इयर इन सर्च 2025’ अहवालानुसार, यंदा युजर्सनी सर्वाधिक शोध घेतला तो पारंपरिक, आरोग्यदायी आणि सांस्कृतिक महत्त्व असलेल्या पदार्थांचा. लोकांचा कल चटकदार फास्ट फूडपेक्षा पौष्टिक आणि अर्थपूर्ण आहाराकडे वळलेला स्पष्टपणे दिसून आला.
यावर्षी गुगलवर (Google) सर्वाधिक सर्च झालेली रेसिपी ठरली इडली. दक्षिण भारतातील हा साधा पण पौष्टिक पदार्थ 2025 मध्ये जागतिक पातळीवर लोकप्रिय झाला. वाफवलेले आणि आंबवलेले पदार्थ आरोग्यासाठी चांगले मानले जात असल्याने, हेल्थ कॉन्शियस लोकांची पहिली पसंती इडली ठरली. हलकी, पचायला सोपी आणि प्रथिनांनी समृद्ध असल्यामुळे इडलीने फूड ट्रेंडमध्ये अव्वल स्थान पटकावले.
महाराष्ट्राचा अभिमान असलेला उकडीचा मोदक यंदा राज्याच्या सीमाही ओलांडून ट्रेंडमध्ये आला. गणेश चतुर्थीच्या काळात पारंपरिक उकडीच्या मोदकांसोबतच ‘चॉकलेट मोदक’ आणि विविध फ्यूजन मोदकांच्या रेसिपी मोठ्या प्रमाणावर सर्च करण्यात आल्या. सात्विक, घरगुती आणि आरोग्यदायी गोड पदार्थ म्हणून मोदकांनी यंदा विशेष लक्ष वेधून घेतले.
बिहार (Bihar) आणि झारखंडमध्ये छठ पूजेदरम्यान तयार होणारा थेकुआ हा पदार्थही 2025 मधील टॉप सर्चमध्ये होता. गहू, गूळ आणि तुपापासून बनणारा हा पदार्थ सणासुदीपुरता मर्यादित न राहता, ‘लाँग लास्टिंग’ आणि ‘ट्रॅव्हल फूड’ म्हणूनही लोकप्रिय ठरला. छठ पूजेचे महत्त्व देशभर वाढल्याने थेकुआची ओळखही व्यापक झाली.
दक्षिण भारतातील उगादी पचाडी या पारंपरिक पदार्थानेही यंदा गुगलवर चांगलीच चर्चा मिळवली. सहा चवींचा संगम असलेला हा पदार्थ आयुष्यातील विविध अनुभवांचे प्रतीक मानला जातो. सण, संस्कृती आणि तत्त्वज्ञान यांचा मेळ घालणाऱ्या या पदार्थाकडे लोकांचा ओढा वाढलेला दिसला.
तसेच उत्तर भारतातील बीटपासून बनवलेले एक आंबवलेले पेयही 2025 मध्ये ‘नॅचरल डिटॉक्स ड्रिंक’ म्हणून ट्रेंडिंग ठरले. प्रोबायोटिक गुणधर्म, हिवाळ्यात देणारी ऊर्जा आणि आकर्षक गडद लाल रंगामुळे या पेयाने सोशल मीडियावरही विशेष लोकप्रियता मिळवली. एकंदरीत, 2025 मधील गुगल सर्च ट्रेंड पाहता, लोकांचा भर केवळ चवीवर नाही तर आरोग्य, परंपरा आणि संस्कृती जपणाऱ्या पदार्थांकडे वाढलेला स्पष्टपणे जाणवतो.
