फॅन्सकडून कुटुंबाला लक्ष्य केल्याबद्दल व्यक्त केली खंत.
आयपीएल २०२६ च्या थरारक हंगामात रॉयल चॅलेंजर्स बंगळुरूने (आरसीबी) जेतेपद पटकावले असले, तरी यादरम्यान विराट कोहली आणि सनरायझर्स हैदराबादचा खेळाडू ट्रेव्हिस हेड यांच्यातील वाद चांगलाच चर्चेत राहिला होता. सामन्यानंतर हस्तांदोलन टाळल्यामुळे आणि त्यानंतर सोशल मीडियावर हेडच्या कुटुंबाला झालेल्या ट्रोलिंगमुळे वातावरण तापले होते. अखेर या सर्व प्रकरणावर खुद्द ट्रेव्हिस हेडने मौन सोडत स्पष्टीकरण दिले आहे. हेडने स्पष्ट केले आहे की, माझ्या आणि विराट कोहलीमध्ये कोणतेही वैयक्तिक भांडण किंवा वाद नाही, त्यामुळे यात पॅचअप करण्यासारखे काहीही नाही. मैदानावरील स्पर्धात्मक वातावरण आणि घडामोडी या खेळाचाच एक भाग असल्याचे सांगत त्याने या प्रकरणावर पडदा टाकण्याचा प्रयत्न केला आहे.
या संपूर्ण वादानंतर सोशल मीडियावर ट्रेव्हिस हेडची पत्नी जेसिका आणि त्यांच्या लहान मुलीला चाहत्यांकडून लक्ष्य करण्यात आले होते. यावर भाष्य करताना हेड म्हणाला की, मी आणि जेसिका या गोष्टींकडे अतिशय परिपक्व आणि योग्य दृष्टिकोनातून पाहतो. आपण ज्या डिजिटल जगात वावरतो, त्याचा हा एक भाग बनला आहे याची आम्हाला जाणीव आहे. परंतु, जेव्हा खेळातील कटुता कुटुंबापर्यंत पोहोचते आणि इतरांना त्रास होतो, तेव्हा खरी समस्या निर्माण होते. खेळाडूंवर टीका करणे समजू शकते, मात्र सोशल मीडियावर खेळाडूंच्या कुटुंबीयांना किंवा लहान मुलांना विनाकारण लक्ष्य करणे चुकीचे असल्याचेही त्याने नमूद केले. हेडच्या या दिलखुलास वक्तव्यामुळे आता या वादावर अखेर पूर्णविराम लागल्याचे स्पष्ट झाले आहे.
