‘वेलकम टू द जंगल’च्या निमित्ताने जुने मने जुळले; आधी ‘हिरोईन’ असलेल्या रवीनाला आता अक्षय का म्हणाला ‘हिरोईनची आई’?
९० च्या दशकात ज्यांच्या अफेअर आणि साखरपुड्याच्या चर्चांनी बॉलिवूडचा संपूर्ण कट्टा गाजला होता, ती एकेकाळची सर्वात गाजलेली जोडी म्हणजे ‘खिलाडी’ अक्षय कुमार आणि ‘मस्त मस्त गर्ल’ रवीना टंडन! काळाच्या ओघात त्यांचे नाते लग्नापर्यंत पोहोचू शकले नाही आणि त्यानंतर हे दोन दिग्गज कलाकार कधीच एकत्र दिसले नाहीत. मात्र, तब्बल २२ वर्षांचा प्रदीर्घ वनवास संपवून अखेर ही जोडी ‘वेलकम टू द जंगल’ या चित्रपटाच्या निमित्ताने पुन्हा एकदा मोठ्या पडद्यावर आमनेसामने आली आहे. हा मल्टिस्टारर चित्रपट नुकताच थिएटरमध्ये प्रदर्शित झाला असून प्रेक्षकांकडून त्याला संमिश्र प्रतिसाद मिळत आहे. दरम्यान, या पुनरागमन सोहळ्यानंतर रवीना टंडनने एका मुलाखतीत अक्षय कुमारबद्दल केलेले विधान सध्या सोशल मीडियावर तुफान व्हायरल होत आहे.
अक्षयसोबतच्या कामाच्या अनुभवावर बोलताना रवीना म्हणाली की, इतक्या वर्षांनंतर त्याच्यासोबत स्क्रीन शेअर करणे अतिशय मजेशीर आणि सुखद होते. इतकी वर्षे उलटली तरी अक्षयमध्ये काहीही बदल झालेला नाही, तो आजही तितकाच ‘हार्डवर्किंग’ आणि आपल्या कामाबद्दल ‘डेडिकेटेड’ आहे. तो सेटवर आल्यावर कायम स्वतःच्या कामात मग्न असतो आणि त्याची हीच मेहनत पडद्यावर चमकते, अशा शब्दांत रवीनाने त्याचे कौतुक केले. अक्षय खरोखरच खूप कष्टाळू अभिनेता असून त्याला आयुष्यात ते सर्व यश मिळावे ज्याचा तो हक्कदार आहे, अशी सदिच्छाही तिने या वेळी व्यक्त केली. यापूर्वी मोहरा, खिलाडिय़ों का खिलाडी, दावा, आणि बारूद अशा अनेक ब्लॉकबस्टर चित्रपटांमध्ये या जोडीने प्रेक्षकांच्या मनावर राज्य केले होते.
दुसरीकडे, ‘वेलकम टू द जंगल’च्या ट्रेलर लाँच दरम्यान अक्षय कुमारनेही रवीनासोबतच्या जुन्या आठवणींना उजाळा दिला. रवीना पूर्वीपासूनच अत्यंत व्यावसायिक (Professional) अभिनेत्री असल्याचे सांगत त्याने शूटिंगचा एक रंजक किस्सा शेअर केला. एका चित्रपटाच्या शूटिंगदरम्यान सूर्यास्त होण्यापूर्वी सीन पूर्ण करायचा होता, पण कपडे बदलण्याची जागा (ग्रीन रूम) खूप लांब होती. वेळ वाया जाऊ नये म्हणून रवीनाने कसलाही नखरा न करता थेट समोर उभ्या असलेल्या जनरेटर व्हॅनमध्ये जाऊन कपडे बदलले आणि तात्काळ शॉटसाठी हजर झाली, असे अक्षयने सांगितले. मात्र, पुढे नेहमीच्या विनोदी अंदाजात चिमटा काढत अक्षय म्हणाला, “काळ बदललाय, पूर्वी ती चित्रपटात हिरोईन असायची आणि आता ती ‘हिरोईनची आई’ झाली आहे.” अक्षयने असा टोला मारण्यामागचे कारण म्हणजे रवीनाची मुलगी राशा थडानी हिनेदेखील आता बॉलिवूडमध्ये पाऊल ठेवले आहे.
