उन्हाळ्याच्या वाढत्या तापमानात शरीराला थंडावा देणारे आणि आरोग्यासाठी फायदेशीर पेय पिण्याचा सल्ला डॉक्टरांकडून दिला जातो. अशा वेळी घरच्या घरी सहज तयार होणारं काकडी आणि पुदिन्याचं ताक हा उत्तम पर्याय ठरू शकतो. चविष्ट आणि पौष्टिक असलेलं हे ताक शरीर हायड्रेट ठेवण्यास मदत करतं, तसेच पचनक्रियाही सुधारतं. विशेष म्हणजे कमी वेळात आणि कमी साहित्यामध्ये हे पेय तयार करता येत असल्यामुळे अनेक गृहिणी आणि आरोग्यप्रेमींमध्ये याची लोकप्रियता वाढताना दिसत आहे.
हे ताक तयार करण्यासाठी सर्वप्रथम मध्यम आकाराची काकडी स्वच्छ धुवून तिची सालं काढून घ्यावीत आणि ती बारीक किसून घ्यावी. त्यानंतर मिक्सरच्या भांड्यात पुदिन्याची ताजी पाने, अर्धी हिरवी मिरची आणि थोडी कोथिंबीर घालून त्याची बारीक पेस्ट तयार करावी. या मिश्रणात एक कप ताजं दही, चवीनुसार काळं मीठ, अर्धा चमचा भाजलेल्या जिऱ्याची पूड आणि थोडासा चाट मसाला घालावा. सर्व मिश्रण पुन्हा एकदा मिक्सरमध्ये फिरवून एकजीव करून घ्यावं.
यानंतर तयार मिश्रणात आवश्यकतेनुसार थंड पाणी घालून ताकाची कन्सिस्टन्सी तयार करावी. शेवटी हे थंडगार ताक ग्लासात ओतून त्यावर थोडी भाजलेल्या जिऱ्याची पूड आणि पुदिन्याची पानं सजावटीसाठी टाकावीत. उन्हाळ्यात दुपारच्या जेवणासोबत किंवा संध्याकाळच्या वेळेत हे ताक प्यायल्यास शरीराला ताजेतवाने वाटते.
काकडीमध्ये भरपूर पाणी आणि फायबर असतं, तर पुदिना शरीराला थंडावा देण्यास मदत करतो. त्यामुळे हे ताक केवळ चविष्टच नाही तर आरोग्यासाठीही अतिशय उपयुक्त मानलं जात आहे.
