‘बीयर शेबा’मध्ये सायरनचा थरार; हूती विद्रोहींचा थेट हस्तक्षेपाचा इशारा आणि जागतिक बाजारात कच्च्या तेलाचा भडका
२८ फेब्रुवारी २०२६ रोजी इराणवर इस्रायल आणि अमेरिकेने केलेल्या मोठ्या हल्ल्यानंतर पश्चिम आशियातील तणावाने आता भीषण युद्धाचे रूप धारण केले आहे. या युद्धात आतापर्यंत इराण, इस्रायल आणि अमेरिका समोरासमोर होते, मात्र आता ‘यमन’मधील हूती विद्रोहींनी थेट उडी घेतल्याने जगाची चिंता वाढली आहे. इस्रायली लष्कराने दिलेल्या माहितीनुसार, यमनमधून इस्रायलच्या ‘बीयर शेबा’ या महत्त्वाच्या शहरावर मिसाईल्स डागण्यात आली आहेत. युद्धाच्या सुरुवातीपासून तटस्थ वाटणाऱ्या यमनचे नाव पहिल्यांदाच थेटपणे समोर आले असून, या हल्ल्यामुळे संपूर्ण इस्रायलमध्ये धोक्याचे सायरन वाजत आहेत.
हूती विद्रोहींनी काही तासांपूर्वीच इशारा दिला होता की, जर इराणवरील हल्ले थांबले नाहीत, तर ते शांत बसणार नाहीत. या नवीन समीकरणामुळे जागतिक बाजारपेठेत कच्च्या तेलाच्या किमतींनी उच्चांक गाठला असून पुरवठा साखळी पूर्णपणे कोलमडण्याच्या मार्गावर आहे. अमेरिकेवर हे युद्ध थांबवण्यासाठी आंतरराष्ट्रीय स्तरावरून मोठा दबाव येत आहे, मात्र दुसरीकडे हुतींच्या हस्तक्षेपामुळे युद्धाची व्याप्ती वाढताना दिसत आहे. जर इतर देशही या संघर्षात ओढले गेले, तर हे केवळ प्रादेशिक युद्ध न राहता तिसऱ्या महायुद्धाची ठिणगी ठरू शकते, अशी भीती व्यक्त केली जात आहे.
