मीडिया आणि सोशल मीडियापासून दूर राहा; राजस्थान रॉयल्सने युवा तुफानाला जपलं, वैभवाच्या बॅटमधून धावांचा पाऊस पडणार?
आयपीएल २०२६ च्या रणधुमाळीत संपूर्ण जगाचे लक्ष ज्या एका खेळाडूवर खिळले आहे, तो म्हणजे राजस्थान रॉयल्सचा अवघ्या १४ वर्षांचा स्फोटक फलंदाज वैभव सूर्यवंशी. मागील हंगामात पदार्पणाच्या पहिल्याच चेंडूवर षटकार ठोकून इतिहास रचणाऱ्या या ‘चाइल्ड प्रॉडिजी’कडून यंदा मोठ्या अपेक्षा आहेत. विशेष म्हणजे, ख्रिस गेलचा नाबाद १७५ धावांचा ऐतिहासिक डोंगर सर करण्याची क्षमता वैभवमध्ये असल्याचे बोलले जात आहे. मात्र, या यशाच्या शिखरावर चढण्यापूर्वी राजस्थान रॉयल्सचा कर्णधार रियान पराग याने वैभवचे कान टोचले आहेत. “मीडियाच्या झगमगाटापासून दूर राहा आणि फक्त खेळावर लक्ष केंद्रित कर,” असा कडक पण प्रेमाचा सल्ला परागने या धाकट्या खेळाडूला दिला आहे.
कमी वयात प्रसिद्धीच्या झोतात आल्यामुळे खेळाडूचे मन विचलित होऊ शकते, ही बाब ओळखून राजस्थान रॉयल्सने वैभवला अधिकृत मीडिया इव्हेंट्स आणि सोशल मीडियापासून लांब ठेवण्याचा निर्णय घेतला आहे. १९ एप्रिल २०२५ रोजी वयाच्या १४ व्या वर्षी लखनौ विरुद्ध पदार्पण करून सर्वांना थक्क करणाऱ्या वैभवने १९ वर्षांखालील विश्वचषकात इंग्लंडविरुद्ध ८० चेंडूत १७५ धावांची वादळी खेळी केली होती. आता आयपीएलच्या मैदानातही अशीच फटकेबाजी पाहण्यासाठी चाहते उत्सुक आहेत. अतिस्तुती किंवा टीकेचा भडिमार त्याच्या कामगिरीवर परिणाम करू नये, यासाठी संघ व्यवस्थापन त्याची ढाल बनून उभे राहिले आहे.
