धाराशिव जिल्ह्यातील प्रसिद्ध तुळजा भवानी मंदिर येथे भाविकांच्या श्रद्धेचा ओघ दिवसेंदिवस वाढताना दिसत आहे. गेल्या दोन वर्षांत मंदिरात सोनं, चांदी आणि रोख देणग्यांमध्ये विक्रमी वाढ झाल्याची माहिती समोर आली असून, मंदिर प्रशासनाने जाहीर केलेल्या आकडेवारीमुळे सर्वांचेच लक्ष वेधले गेले आहे. देशाच्या विविध भागांतून येणारे भाविक देवीच्या चरणी मोठ्या भक्तिभावाने दान अर्पण करत असल्याने मंदिराच्या संपत्तीत मोठी भर पडत आहे.
मंदिर प्रशासनाने मार्च अखेरीस केलेल्या मोजदादीनुसार, मंदिराच्या तिजोरीत तब्बल २५३ किलो ३० ग्रॅम सोनं आणि सुमारे ४५२३ किलो चांदी जमा असल्याचे समोर आले आहे. ही आकडेवारी पाहता तुळजाभवानी मंदिरातील देणग्यांमध्ये मोठी वाढ झाल्याचे स्पष्ट होत आहे. विशेष म्हणजे, गेल्या दोन वर्षांच्या सरासरीचा विचार केला असता दररोज सुमारे सात तोळे सोनं आणि जवळपास सात किलो चांदी देवीला अर्पण करण्यात आल्याचेही समोर आले आहे.
मंदिर प्रशासनाच्या माहितीनुसार, भाविकांकडून केवळ दागिनेच नव्हे तर मोठ्या प्रमाणात रोख रक्कमही अर्पण केली जात आहे. देवीवरील श्रद्धा आणि नवसपूर्तीच्या भावनेतून भक्त मोठ्या प्रमाणावर दान करत असल्याचे सांगितले जात आहे. विशेषतः नवरात्रोत्सव, पौर्णिमा आणि इतर धार्मिक सणांच्या काळात मंदिरात भाविकांची गर्दी मोठ्या प्रमाणात वाढत असल्याने देणग्यांमध्येही वाढ होत आहे.
दरम्यान, मागील काही वर्षांत दक्षिण भारतातून तुळजाभवानी देवीच्या दर्शनासाठी येणाऱ्या भाविकांची संख्या लक्षणीय वाढली आहे. त्याचा सकारात्मक परिणाम मंदिराच्या देणग्यांवरही दिसून येत आहे. वाढत्या देणग्या आणि भाविकांचा ओघ पाहता तुळजाभवानी मंदिर आता देशातील श्रीमंत आणि महत्त्वाच्या देवस्थानांपैकी एक म्हणून अधिक चर्चेत आले आहे.
