“पक्षातील भ्रष्टाचारामुळे राजीनामा देतोय”; उपराष्ट्रपती सीपी राधाकृष्णन यांच्याकडे सोपवले राजीनामा पत्र; कोयल मलिक यांच्याही राजीनाम्याची चर्चा
पश्चिम बंगाल विधानसभा निवडणुकीच्या निकालानंतर मुख्यमंत्री ममता बॅनर्जी यांच्यासमोरील राजकीय अडचणी थांबण्याचे नाव घेत नाहीत. राज्यातील तृणमूल काँग्रेसच्या (TMC) अनेक आमदारांनी आधीच बंडाचा झेंडा फडकवलेला असताना, आता दिल्लीच्या राजकीय वर्तुळातून ममता बॅनर्जी यांना अत्यंत मोठा धक्का बसला आहे. तृणमूल काँग्रेसचे ज्येष्ठ नेते आणि राज्यसभा खासदार शुखेंदु शेखर रॉय यांनी आपल्या खासदारकीचा आणि पक्षाच्या सर्व पदांचा तडकाफडकी राजीनामा दिला आहे. रॉय यांनी थेट उपराष्ट्रपती आणि राज्यसभेचे सभापती सीपी राधाकृष्णन यांच्या निवासस्थानी जाऊन आपला राजीनामा सोपवला. या धक्कादायक निर्णयामुळे राजकीय वर्तुळात मोठी खळबळ उडाली आहे.
राजीनामा दिल्यानंतर प्रसारमाध्यमांशी बोलताना शुखेंदु शेखर रॉय यांनी ममता बॅनर्जी आणि तृणमूल काँग्रेसवर भ्रष्टाचाराचे गंभीर आरोप केले. “पक्षात अंतर्गत भ्रष्टाचाराविरुद्ध आवाज उठवल्यानंतर मला जाणीवपूर्वक वेगळे पाडण्यात आले. गेल्या पाच वर्षांत पश्चिम बंगालमध्ये जो काही भ्रष्टाचार झाला आहे, त्या सर्वांची सखोल चौकशी झाली पाहिजे अशी मी सरकारकडे मागणी करतो,” असे रॉय म्हणाले. इतकेच नाही तर विरोधी पक्षांच्या ‘इंडिया’ (INDIA) आघाडीवरही त्यांनी थेट निशाणा साधला. “या आघाडीला कोणतेही भविष्य नाही,” असे म्हणत त्यांनी तृणमूल काँग्रेस सोडण्याचे मुख्य कारण पक्षात वाढलेला भ्रष्टाचार हेच असल्याचे स्पष्ट केले.
शुखेंदु शेखर रॉय हे २०११ मध्ये तृणमूल काँग्रेसमध्ये सामील झाले होते आणि त्यानंतर ते ममता बॅनर्जी यांच्या अत्यंत विश्वासू आणि निकटवर्तीय नेत्यांपैकी एक मानले जात होते. पक्षाच्या पडत्या काळातही ते खंबीरपणे उभे राहिले. मात्र, राज्यातील राजकीय समीकरणे बदलल्यानंतर त्यांनी पक्ष सोडण्याचा निर्णय घेतला. राजीनाम्यानंतर रॉय यांनी भारतीय जनता पक्षाचे (BJP) उघडपणे कौतुक केल्याने, ते लवकरच अधिकृतपणे भाजपमध्ये प्रवेश करणार असल्याचे संकेत मिळत आहेत. सध्या तृणमूल काँग्रेसची अवस्था महाराष्ट्रातील शिवसेनेसारखी (बंडखोरी आणि फुटीमुळे) झाली असल्याची चर्चा राजकीय वर्तुळात रंगू लागली आहे.
दरम्यान, तृणमूल काँग्रेसचे दोन खासदार राज्यसभेचा राजीनामा देणार असल्याची चर्चा राजकीय वर्तुळात आधीपासूनच सुरू होती, ज्यामध्ये शुखेंदु शेखर रॉय यांच्यानंतर कोयल मलिक यांचेही नाव समोर आले आहे. कोयल मलिक यांना तृणमूल काँग्रेसने याच वर्षाच्या सुरुवातीला (एप्रिल महिन्यात) राज्यसभेवर पाठवले होते. अद्याप कोयल मलिक यांच्या राजीनाम्याची अधिकृत घोषणा किंवा बातमी समोर आलेली नसली, तरी रॉय यांच्या राजीनाम्यामुळे तृणमूल काँग्रेसमधील अंतर्गत धुसफुस आता चव्हाट्यावर आली आहे. आर. जी. कार रुग्णालय प्रकरणासह इतर अनेक मुद्द्यांमुळे पश्चिम बंगालमधील जनतेच्या मनात सरकारविरोधात प्रचंड संताप असल्याचेही रॉय यांनी शेवटी नमूद केले.
