आयपीएल २०२६ गाजवणारा युवा स्टार वैभव सूर्यवंशीला टीम इंडियाचे बोलावणे; आयर्लंड अन् इंग्लंड दौऱ्यासाठी आज होणार संघ घोषित
भारतीय क्रिकेट नियामक मंडळ (BCCI) शनिवारी, ६ जून रोजी आयर्लंड आणि इंग्लंड दौऱ्यासाठी भारतीय टी२० (T20I) संघाची घोषणा करण्याची शक्यता आहे. ईएसपीएनक्रिकइन्फोच्या अहवालानुसार, या आगामी दौऱ्यासाठी निवडकर्ते भारतीय संघात मोठे फेरबदल करण्याच्या तयारीत असून, एका नव्या कर्णधाराच्या नावाची घोषणा केली जाऊ शकते. विशेष म्हणजे, मार्च २०२६ मध्ये भारताला टी२० विश्वचषक जिंकून देणाऱ्या सूर्यकुमार यादवला कर्णधारपदावरून हटवले जाण्याची दाट शक्यता आहे. त्याच्या जागी धमाकेदार फलंदाज श्रेयस अय्यरकडे टी२० संघाचे नेतृत्व सोपवले जाऊ शकते. यासोबतच उपकर्णधारपदातही बदल होणार असून, अष्टपैलू खेळाडू अक्षर पटेलकडे ही जबाबदारी दिली जाण्याची चिन्हे आहेत.
हा निर्णय घेण्यामागे सूर्यकुमार यादवची अलीकडची सुमार कामगिरी कारणीभूत असल्याचे बोलले जात आहे. २०२६ च्या टी२० विश्वचषकात त्याने १३६.७२ च्या स्ट्राईक रेटने २४२ धावा केल्या होत्या, परंतु त्यानंतर आयपीएल २०२६ च्या हंगामात त्याला सूर गवसला नाही. आयपीएलच्या १३ सामन्यांत त्याने २०.७६ च्या सरासरीने केवळ २०७ धावा केल्या. या खराब फॉर्ममुळे त्याचे केवळ कर्णधारपदच जाणार नाही, तर संघातील त्याचे स्थानही धोक्यात आले आहे. राष्ट्रीय निवडकर्ते आता २०२८ मधील लॉस एंजेलिस ऑलिम्पिक आणि त्यानंतर ऑस्ट्रेलिया व न्यूझीलंडमध्ये होणाऱ्या टी२० विश्वचषकासाठी दूरदृष्टी ठेवून तरुण संघाची बांधणी करत आहेत.
या दौऱ्याचे सर्वात मोठे वैशिष्ट्य म्हणजे आयपीएल २०२६ मध्ये आपल्या फलंदाजीने इतिहास रचणारा युवा खेळाडू वैभव सूर्यवंशी याचे भारतीय संघात आगमन होणार आहे. सचिन तेंडुलकर यांच्यानंतर इतक्या कमी वयात भारतीय संघात स्थान मिळवणारा तो दुसरा खेळाडू ठरू शकतो:
वैभवने आयपीएल २०२६ मध्ये राजस्थान रॉयल्सकडून खेळताना २३७.३० च्या अद्भूत स्ट्राईक रेटने ७७६ धावा कुटल्या आणि ‘ऑरेंज कॅप’वर आपले नाव कोरले. केवळ १५ वर्षांच्या या खेळाडूने दिग्गज गोलंदाजांची धुलाई केल्यामुळे निवडकर्ते त्याला थेट वरिष्ठ संघात संधी देणार आहेत. आयर्लंड आणि इंग्लंडच्या मुख्य दौऱ्यावर जाण्यापूर्वी, वैभव सूर्यवंशी ९ ते २१ जून या कालावधीत श्रीलंकेमध्ये इंडिया ‘ए’ संघाकडून एका त्रिकोणीय मालिकेत खेळणार आहे, ज्यामध्ये अफगाणिस्तानचा संघही सहभागी आहे.
टी२० विश्वचषक जिंकल्यानंतर भारतीय संघ पहिल्यांदाच आंतरराष्ट्रीय टी२० क्रिकेट खेळणार असून, या नव्या दमाच्या संघाकडे आणि श्रेयस अय्यरच्या नेतृत्वाकडे आता संपूर्ण क्रिकेट विश्वाचे लक्ष लागले आहे.
