इटलीच्या वॉल्टर जेंगाचा ५१७ मिनिटांचा रेकॉर्ड उद्ध्वस्त; वर्ल्डकप २०२६ च्या उपउपांत्यपूर्व फेरीत स्पेनची दिमाखात एन्ट्री
फिफा वर्ल्डकप २०२६ स्पर्धेतील ‘राउंड ऑफ ३२’ च्या थरारात स्पेनने ऑस्ट्रियाचा ३-० असा धुव्वा उडवत उपउपांत्यपूर्व फेरीत (Pre-Quarter Finals) दिमाखात प्रवेश केला आहे. या एकतर्फी विजयाइतकीच सध्या फुटबॉल जगतात चर्चा रंगली आहे ती म्हणजे स्पेनचा २९ वर्षीय स्टार गोलकीपर उनाई सिमोनची (Unai Simon). ऑस्ट्रियाविरुद्धच्या सामन्यात सिमोनने अशी कामगिरी केली, ज्याची नोंद फुटबॉल विश्वाच्या इतिहासात सुवर्णअक्षरांनी केली जाईल. वर्ल्डकपच्या इतिहासात सलग सर्वाधिक काळ आपल्या गोलपोस्टमध्ये एकही गोल जाऊ न देणारा तो जगातील पहिला गोलकीपर ठरला असून त्याने तब्बल ३६ वर्षे जुना जागतिक विक्रम मोडीत काढला आहे. चालू विश्वचषक स्पर्धेत सलग चौथ्या सामन्यात त्याने ‘क्लीन शीट’ राखली आहे.
उनाई सिमोनची मागच्या दोन वर्ल्डकपमधील आकडेवारी पाहिली तर त्याने मैदानात तब्बल ५१९ मिनिटे झुंज दिली आहे. या प्रदीर्घ कालावधीत जगातील कोणत्याही संघाच्या मातब्बर फुटबॉलपटूला स्पेनच्या गोलपोस्टचा भेद करता आलेला नाही. यासह सिमोनने इटलीचे महान गोलरक्षक वॉल्टर जेंगा यांचा ऐतिहासिक विक्रम मोडला. जेंगा यांनी १९९० च्या वर्ल्डकपमध्ये मायदेशात खेळताना सलग ५१७ मिनिटे विरोधी संघाला एकही गोल करू दिला नव्हता. गेल्या साडेतीन दशकांपासून हा विक्रम अबाधित होता, जो आता सिमोनने आपल्या नावावर केला आहे. याशिवाय, ऑस्ट्रियाविरुद्धच्या सामन्यातच त्याने स्पेनचे माजी दिग्गज गोलकीपर इकर कॅसिआस (२०१० आणि २०१४ चा रेकॉर्ड) यांनाही मागे टाकले आहे.
मजेशीर बाब म्हणजे ऑस्ट्रियाविरुद्धच्या सामन्यात स्पेनच्या मजबूत बचावामुळे सिमोनला फारशी मेहनत करावी लागली नाही, कारण विरोधी संघाला एकही ‘शॉट ऑन टार्गेट’ मारता आला नाही. या संपूर्ण स्पर्धेत स्पेनविरुद्ध विरोधी संघांनी केवळ ४ अचूक शॉट मारले आणि ते सर्व सिमोनने अत्यंत शिताफीने अडवले आहेत.
| गोलकीपर | देश | सलग गोल न होऊ देण्याचा रेकॉर्ड (मिनिटे) | वर्ष |
|---|---|---|---|
| उनाई सिमोन | स्पेन | ५१९ मिनिटे | २०२६ |
| वॉल्टर जेंगा | इटली | ५१७ मिनिटे | १९९० |
स्पेनच्या संघात सध्या गोलरक्षकाच्या जागेसाठी प्रचंड गळेकापू स्पर्धा सुरू आहे. आर्सेनल क्लबसाठी सलग तीन प्रीमियर लीग गोल्डन ग्लोव्ह जिंकणारा डेव्हिड राया आणि बार्सिलोनाचा जगातील सर्वोत्तम युवा गोलकीपर गार्सिया हे दोन्ही मॅच-विनर खेळाडू सध्या अतिरिक्त खेळाडू (बेंच) म्हणून बसले आहेत. अशा तगड्या स्पर्धेतही स्पेनचे मुख्य प्रशिक्षक लुईस दे ला फुएंते यांनी सिमोनवर दाखवलेला सार्थ विश्वास त्याने या महाविक्रमी कामगिरीने पूर्णपणे सार्थ ठरवला आहे.
