भव्य सेट पण साधी सुविधाही नाही; स्टुडिओ मालकाकडे हट्ट धरला आणि समोर आला ‘थंडर बॉक्स’, अभिनेत्रीने उघडले जुन्या काळातील गुपित
हिंदी चित्रपटसृष्टीचा सुवर्णकाळ जितका पडद्यावर झगमगीत दिसायचा, तितकाच तो पडद्यामागे संघर्षाचा होता, याचा प्रत्यय ज्येष्ठ अभिनेत्री वहीदा रहमान यांनी सांगितलेल्या एका अनुभवातून येतो. ‘द कपिल शर्मा शो’मध्ये बोलताना त्यांनी ऐतिहासिक ‘मुगल-ए-आझम’ चित्रपटाच्या शूटिंगदरम्यानचा एक थक्क करणारा किस्सा शेअर केला. ज्या काळात पृथ्वीराज कपूर, दिलीप कुमार आणि मधुबाला यांसारखे दिग्गज कलाकार एका भव्य कलाकृतीसाठी एकत्र आले होते, त्याच काळात सेटवर साध्या वॉशरूमची (शौचालय) सोय नव्हती, ही धक्कादायक बाब त्यांनी समोर आणली आहे.
वहीदा रहमान यांच्या सांगण्यानुसार, मुंबईतील मोहन स्टुडिओमध्ये जेव्हा या चित्रपटाचे शूटिंग सुरू होते, तेव्हा तिथे मूलभूत सुविधांचा मोठा अभाव होता. तासनतास शूटिंग सुरू असताना कलाकारांना नैसर्गिक विधींसाठी मोठी कसरत करावी लागायची. ही गैरसोय इतकी वाढली होती की, स्वतः वहीदा रहमान आणि विनोदी अभिनेते महमूद यांनी पुढाकार घेतला. त्यांनी स्टुडिओ मालकांशी चर्चा केली आणि स्वतःच्या खिशातून काही पैसे देऊन स्टुडिओमध्ये वॉशरूम बांधण्याची विनंती केली. मात्र, जेव्हा काही दिवसांनी त्या पुन्हा शूटिंगसाठी आल्या, तेव्हा तिथली परिस्थिती पाहून त्या अक्षरशः अवाक झाल्या.
स्टुडिओ प्रशासनाने पक्के शौचालय बांधण्याऐवजी कॉरिडॉरमध्ये केवळ एक ‘थंडर बॉक्स’ (तात्पुरता शौच डबा) आणून ठेवला होता. हे पाहून कलाकारांना हसावे की रडावे हे कळेनासे झाले. या असुविधेमुळे त्या काळातील अभिनेत्रींनी आणि कलाकारांनी सेटवर पाणी पिणे देखील कमी केले होते, जेणेकरून त्यांना वारंवार वॉशरूमला जाण्याची गरज पडू नये. आजच्या ‘व्हॅनिटी व्हॅन’च्या काळात हा किस्सा ऐकताना जुन्या काळातील कलाकारांनी किती कठीण परिस्थितीत काम करून ‘मुगल-ए-आझम’सारखा अजरामर चित्रपट दिला, याचा अभिमान वाटल्याशिवाय राहत नाही.
