भारत दौऱ्यात इतिहास रचणाऱ्या न्यूझीलंडनंतर श्रीलंका–इंग्लंड मालिकेला सुरुवात
न्यूझीलंड संघाने भारत दौऱ्यात दमदार कामगिरी करत यजमान टीम इंडियाला तीन सामन्यांच्या एकदिवसीय मालिकेत 2-1 असा पराभव दिला. विशेष म्हणजे, भारतात पहिल्यांदाच एकदिवसीय मालिका जिंकण्याचा पराक्रम न्यूझीलंडने केला आहे. या ऐतिहासिक विजयानंतर आता भारत आणि न्यूझीलंड यांच्यात पाच सामन्यांची टी20 आंतरराष्ट्रीय मालिका खेळवली जाणार असून, या मालिकेला 21 जानेवारीपासून सुरुवात होणार आहे. वर्ल्ड कपपूर्वीची ही अखेरची टी20 मालिका असल्याने दोन्ही संघांसाठी ती अत्यंत महत्त्वाची मानली जात आहे.
दुसरीकडे, इंग्लंडचा श्रीलंका दौरा गुरुवार, 22 जानेवारीपासून सुरू होत आहे. या दौऱ्यात इंग्लंड आणि श्रीलंका यांच्यात तीन एकदिवसीय आणि तीन टी20 आंतरराष्ट्रीय सामने खेळवले जाणार आहेत. परंपरेप्रमाणे इंग्लंड क्रिकेट बोर्डाने पहिल्या एकदिवसीय सामन्याआधीच प्लेइंग इलेव्हन जाहीर केली आहे.
श्रीलंका विरुद्ध इंग्लंड यांच्यातील पहिला वनडे सामना कोलंबो येथील आर. प्रेमदासा स्टेडियमवर होणार आहे. या सामन्यात हॅरी ब्रूक इंग्लंड संघाचे नेतृत्व करणार आहे. विशेष बाब म्हणजे, सलामीवीर झॅक क्रॉली तब्बल दोन वर्षांनंतर एकदिवसीय संघात पुनरागमन करत आहे.
इंग्लंडच्या डावाची सुरुवात झॅक क्रॉली आणि बेन डकेट करणार आहेत. मधल्या फळीत जो रूट, जेकब बेथेल, कर्णधार हॅरी ब्रूक आणि विकेटकीपर जोस बटलर यांच्यावर डाव सावरण्याची जबाबदारी असेल.
श्रीलंकेतील खेळपट्ट्यांचा विचार करता इंग्लंडने फिरकीवर भर दिला असून, आदिल रशीद आणि लियाम डॉसन या अनुभवी फिरकीपटूंना संघात स्थान देण्यात आले आहे. त्यांना स्पिन ऑलराउंडर विल जॅक्सची साथ मिळणार आहे.
श्रीलंकेविरुद्ध पहिल्या वनडेसाठी इंग्लंडची प्लेइंग इलेव्हन:
झॅक क्रॉली, बेन डकेट, जो रूट, जेकब बेथेल, हॅरी ब्रूक (कर्णधार), जोस बटलर (विकेटकीपर), विल जॅक्स, सॅम करन, जेमी ओव्हरटन, लियाम डॉसन आणि आदिल रशीद.
दरम्यान, श्रीलंका संघाचे नेतृत्व चरिथ असलंका करणार असून, मायदेशात बलाढ्य इंग्लंडविरुद्ध मालिका जिंकण्याचे मोठे आव्हान त्याच्यासमोर असणार आहे. वर्ल्ड कपच्या पार्श्वभूमीवर ही मालिका दोन्ही संघांसाठी निर्णायक ठरण्याची शक्यता आहे.
