न्यूझीलंडकडून मालिका गमावल्यानंतर स्टेडियममध्ये गदारोळ
भारत आणि न्यूझीलंड यांच्यातील तीन सामन्यांची एकदिवसीय मालिका न्यूझीलंडने 2-1 अशी जिंकत इतिहास घडवला. या पराभवामुळे भारतीय क्रिकेटप्रेमींमध्ये तीव्र नाराजी दिसून आली. विशेषतः इंदूरच्या होळकर स्टेडियममध्ये खेळवण्यात आलेल्या निर्णायक सामन्यानंतर वातावरण चांगलंच तापलं होतं.
सामना संपताच स्टेडियममध्ये उपस्थित काही प्रेक्षकांनी थेट टीम इंडियाचे मुख्य प्रशिक्षक गौतम गंभीर यांच्याविरोधात घोषणा देण्यास सुरुवात केली. “गौतम गंभीर हाय-हाय” अशा घोषणांनी संपूर्ण स्टेडियम दुमदुमून गेलं. विशेष बाब म्हणजे मैदानावर त्या वेळी भारतीय संघातील खेळाडू आणि सपोर्ट स्टाफ उपस्थित असतानाच हा प्रकार घडला.
या घोषणांमुळे विराट कोहली स्पष्टपणे अस्वस्थ झाल्याचं दिसून आलं. त्याने तत्काळ गर्दीकडे पाहत हाताच्या इशाऱ्याने चाहत्यांना शांत राहण्याचं आवाहन केलं. प्रशिक्षकाविरोधात होणारी टीका त्याला अजिबात रुचली नाही आणि त्याने जबाबदारीने परिस्थिती हाताळत मैदानावर सकारात्मक संदेश दिला. विराटच्या या प्रतिक्रियेचा व्हिडिओ सध्या सोशल मीडियावर मोठ्या प्रमाणात व्हायरल होत आहे.
महत्त्वाचं म्हणजे न्यूझीलंडने पहिल्यांदाच भारतात एकदिवसीय मालिका जिंकली आहे. तसेच याआधी निर्णायक सामन्यात भारताला हरवण्यातही त्यांना कधी यश मिळालं नव्हतं. त्यामुळे चाहत्यांच्या अपेक्षा मोठ्या होत्या. मात्र पराभवानंतर नाराजीचा भडका उडाल्याचं चित्र इंदूरमध्ये पाहायला मिळालं.
