इंग्लंडचे अनुभवी निकोलस ली बनणार टीम इंडियाचे नवे स्ट्रेंथ अँड कंडिशनिंग कोच, ऑस्ट्रेलिया दौऱ्यापासून जबाबदारी
भारतीय महिला क्रिकेट संघाच्या तयारीला आणखी बळकटी देण्यासाठी भारतीय क्रिकेट नियामक मंडळाने (BCCI) एक महत्त्वाचा निर्णय घेतला आहे. संघासाठी नवीन स्ट्रेंथ आणि कंडिशनिंग कोचची नियुक्ती करण्यात येणार असून ही जबाबदारी इंग्लंडचे अनुभवी क्रीडा प्रशिक्षक निकोलस ली यांच्याकडे सोपवण्यात आली आहे.
महिला प्रीमियर लीग (WPL) 2026 ची सांगता झाल्यानंतर निकोलस ली हे अधिकृतपणे भारतीय महिला संघात रुजू होतील. याच कालावधीत भारतीय संघ ऑस्ट्रेलियाच्या कठीण दौऱ्यावर जाणार असून, त्या दौऱ्यापासूनच ली संघाच्या फिटनेस आणि शारीरिक तयारीची सूत्रे हाती घेतील.
WPL 2026 ही स्पर्धा 9 जानेवारीपासून सुरू होऊन 5 फेब्रुवारीपर्यंत चालणार आहे. त्यानंतर लगेचच भारतीय महिला संघ ऑस्ट्रेलियात विविध फॉरमॅटमधील मालिकांसाठी मैदानात उतरणार आहे. ही मालिका 15 फेब्रुवारी ते 9 मार्चदरम्यान पार पडणार आहे.
क्रिकेट आणि एलीट स्पोर्ट्समध्ये निकोलस ली यांचा प्रदीर्घ अनुभव आहे. ते माजी प्रथम श्रेणी क्रिकेटपटू असून त्यांनी 13 सामन्यांत 490 धावा केल्या आहेत. अलीकडेच त्यांनी यूएईमध्ये झालेल्या आयएलटी20 लीगमध्ये गल्फ जायंट्स संघासोबत काम केले आहे.
याआधी त्यांनी जानेवारी 2024 ते डिसेंबर 2025 या कालावधीत अफगाणिस्तान क्रिकेट संघाचे स्ट्रेंथ अँड कंडिशनिंग कोच म्हणून काम पाहिले. तसेच मार्च 2020 ते जानेवारी 2024 दरम्यान बांगलादेश क्रिकेट बोर्डात फिजिकल परफॉर्मन्स हेडची जबाबदारी त्यांनी सांभाळली होती. श्रीलंका पुरुष संघासोबतही ते काही वर्षे जोडलेले होते.
देशांतर्गत पातळीवर, ससेक्स काउंटी क्रिकेट क्लबमध्ये त्यांनी मुख्य प्रशिक्षक आणि सहाय्यक प्रशिक्षक म्हणून काम केले आहे. अँग्लिया रस्किन विद्यापीठाचे पदवीधर असलेले निकोलस ली आधुनिक फिटनेस तंत्रज्ञान आणि खेळाडूंच्या शारीरिक क्षमतेवर विशेष भर देणारे प्रशिक्षक म्हणून ओळखले जातात.
ऑस्ट्रेलियासारख्या बलाढ्य संघाविरुद्ध होणाऱ्या आगामी दौऱ्याच्या पार्श्वभूमीवर ही नियुक्ती भारतीय महिला संघासाठी अत्यंत महत्त्वाची मानली जात आहे. ली यांच्या अनुभवामुळे संघाच्या तंदुरुस्ती, कामगिरी आणि सातत्यात सकारात्मक बदल होईल, अशी अपेक्षा व्यक्त केली जात आहे.
