विचित्र आवाज, पाण्याचं बदलतं तापमान आणि वाढलेलं वीज बिल—ही आहेत गीझर बदलण्याची धोक्याची चिन्हे
थंडीचा कडाका वाढताच घराघरात गरम पाण्याची गरज मोठ्या प्रमाणात वाढते. आंघोळ, भांडी धुणं किंवा दैनंदिन कामांसाठी गीझर हा अत्यावश्यक उपकरण बनतो. विशेषतः थंड भागात गीझरशिवाय दैनंदिन जीवन जवळपास अशक्यच होतं. मात्र, अनेक वर्षं वापरलेला जुना गीझर केवळ गैरसोयीचा नाही, तर तो थेट धोकादायक ठरू शकतो.
तज्ज्ञांच्या मते, इतर इलेक्ट्रॉनिक उपकरणांप्रमाणेच गीझरचंही एक ठराविक आयुष्य असतं. दीर्घकाळ वापर केल्यानंतर त्यातील अंतर्गत भाग झिजतात. तरीही अनेक जण छोट्या त्रुटींकडे दुर्लक्ष करतात आणि वेळेवर दुरुस्ती किंवा बदल करत नाहीत. परिणामी, अपघाताचा धोका वाढतो.
गीझरमधून येणारे विचित्र आवाज हे त्याचं पहिलं आणि महत्त्वाचं लक्षण मानलं जातं. गीझर सुरू केल्यानंतर फटफटणे, खडखडाट किंवा मोठा आवाज येत असेल, तर त्यामागे हीटिंग रॉडवर साचलेलं मीठ कारणीभूत असू शकतं. यामुळे पाणी गरम करण्यासाठी गीझरवर जास्त ताण येतो आणि कधी पाणी नीट गरम होत नाही, तर कधी अतिशय तापलेलं पाणी येतं. अशा स्थितीत टाकीतील दाब वाढून गंभीर धोका निर्माण होऊ शकतो, अगदी टाकी फुटण्याचीही शक्यता असते.
याशिवाय, आंघोळ करताना पाण्याचं तापमान सतत बदलत असेल—कधी थंड, कधी खूप गरम—तर थर्मोस्टॅट किंवा हीटिंग एलिमेंटमध्ये बिघाड झाल्याचं ते संकेत असतात. हे केवळ त्रासदायकच नाही, तर जळजळ होण्यासारख्या अपघातांना कारणीभूत ठरू शकतं.
गीझरमधून पाणी टपकणं किंवा टाकी, व्हॉल्व्ह आणि पाईपजवळ गळती दिसणं हेही गंभीर इशारा आहे. अशा गळतीमुळे भिंती ओलसर होतात आणि अंतर्गत नुकसान वाढत जातं. दुसरीकडे, गीझर वारंवार बिघडत असेल आणि सतत मेकॅनिकला बोलवावं लागत असेल, तर तो बदलण्याचीच योग्य वेळ आलेली असते.
तज्ज्ञ आणखी एका महत्त्वाच्या मुद्द्याकडे लक्ष वेधतात—वीज बिलात होणारी अचानक वाढ. जुने गीझर समान प्रमाणात पाणी गरम करण्यासाठी जास्त वीज वापरतात. वापरात बदल नसतानाही बिल वाढत असेल, तर त्यामागे जुना गीझर कारणीभूत असू शकतो.
सध्या बाजारात उपलब्ध असलेल्या नवीन गीझरमध्ये उत्तम इन्सुलेशन आणि आधुनिक तंत्रज्ञान वापरलं जातं. त्यामुळे कमी वीजेत पाणी लवकर गरम होतं आणि वीज बिलावरही ताण कमी पडतो.
एकंदरीत, जर तुमच्या गीझरमध्ये विचित्र आवाज, पाण्याच्या तापमानात बदल, गळती, वारंवार बिघाड किंवा वाढलेलं वीज बिल अशी लक्षणं दिसत असतील, तर वेळ न दवडता नवीन गीझर घेणंच तुमच्या सुरक्षिततेसाठी योग्य ठरेल.
