अमेरिकेचे अध्यक्ष डोनाल्ड ट्रम्प यांनी आयात शुल्काच्या धोरणात आणखी एक महत्त्वपूर्ण निर्णय घेत भारतीय औषध उद्योगासमोर नवे आव्हान उभे केले आहे. अमेरिकेत आयात होणाऱ्या जेनेरिक औषधांवर आगामी काळात टप्प्याटप्प्याने टॅरिफ वाढवण्याची घोषणा करण्यात आली आहे. या निर्णयाचा थेट परिणाम अमेरिकेच्या बाजारपेठेवर मोठ्या प्रमाणात अवलंबून असलेल्या भारतीय औषध कंपन्यांवर होण्याची शक्यता आहे.
ट्रम्प यांच्या घोषणेनुसार, १ ऑगस्ट २०२६ पासून सुरुवातीच्या दोन वर्षांसाठी जेनेरिक औषधांवरील आयात शुल्क शून्य राहणार आहे. मात्र, त्यानंतर शुल्कात हळूहळू वाढ केली जाणार असून तिसऱ्या वर्षी ते १०० टक्क्यांपर्यंत पोहोचू शकते. पुढील काळात हे शुल्क २०० टक्क्यांपर्यंत वाढण्याची शक्यताही व्यक्त करण्यात आली आहे.
अमेरिकेतील औषध उत्पादनाला चालना देणे आणि परदेशी कंपन्यांना अमेरिकेतच उत्पादन सुविधा उभारण्यास प्रवृत्त करणे, हा या धोरणामागील मुख्य उद्देश असल्याचे ट्रम्प यांनी स्पष्ट केले आहे. निर्धारित कालावधीत अमेरिकेत कारखाने उभारण्यात अपयशी ठरणाऱ्या कंपन्यांवर कठोर कारवाई होऊ शकते.
भारत हा अमेरिकेला जेनेरिक औषधांचा प्रमुख पुरवठादार असल्याने या निर्णयामुळे भारतीय कंपन्यांच्या निर्यात खर्चात वाढ होण्याची आणि व्यवसायावर दबाव येण्याची शक्यता आहे.
