खासदार फुटल्यानंतर ठाकरे मैदानात; राम मंदिरातील ‘दान चोरी’च्या मुद्द्यावरून हिंदुत्वाच्या नव्या लढाईची घोषणा
शिवसेना (उबाठा) पक्षात झालेल्या ताज्या पडझडीनंतर पक्षप्रमुख उद्धव ठाकरे यांनी थेट मैदानात उतरून बंडखोरांना आणि सत्ताधारी भाजपला आव्हान देण्यास सुरुवात केली आहे. मागच्या आठवड्यात पक्षाचे ९ पैकी ६ खासदार फुटल्यानंतर, पक्ष संघटना स्थानिक पातळीवर कमकुवत होऊ नये आणि निष्ठावंत शिवसैनिकांचे नीचैर्य खच्चीकरण होऊ नये, यासाठी ठाकरेंनी ‘ॲक्शन मोड’मध्ये येत फुटलेल्या खासदारांचे मतदारसंघ पिंजून काढण्यास सुरुवात केली आहे. याच दौऱ्याचा भाग म्हणून आज यवतमाळ येथे आयोजित निष्ठावंतांच्या भव्य मेळाव्यात बोलताना उद्धव ठाकरे यांनी बंडखोरांचा समाचार तर घेतलाच, पण अयोध्येतील राम मंदिरात समोर आलेल्या दान चोरीच्या प्रकरणावरून भाजपवर आतापर्यंतचा सर्वात मोठा आणि थेट हल्लाबोल केला.
अयोध्येतील राम मंदिरात दान चोरीचा प्रकार उघडकीस आल्यानंतर उत्तर प्रदेश सरकारने या प्रकरणी ‘एसआयटी’ (SIT) नेमून चौकशी सुरू केली आहे. याच मुद्द्याचा धागा पकडत उद्धव ठाकरे यांनी यवतमाळच्या सभेतून भाजपला धारेवर धरले. “आता हिंदूंना जागृती आली पाहिजे. नेहमी मोर्चे काढणारे ‘सकल हिंदू समाज’ वाले आता कुठे झोपले आहेत?” असा खोचक सवाल त्यांनी केला. राम मंदिराला भोंदूंच्या विळख्यातून सोडवण्यासाठी आता ‘भाजपमुक्त राम’ ही नवी मोहीम हाती घ्यावी लागेल आणि त्यासाठी आंदोलनाची पहिली ठिणगी महाराष्ट्रच टाकेल, अशी मोठी घोषणा ठाकरेंनी या वेळी केली. आम्ही रामाला या राजकीय विळख्यातून मुक्त करणारच, असा निर्धार त्यांनी बोलून दाखवला.
आपल्या आक्रमक भाषणात उद्धव ठाकरे यांनी बंडखोर खासदारांवरही कडाडून टीका केली. शेतकऱ्यांना पीकविमा का मिळाला नाही, यावर हे गद्दार संसदेत तोंड उघडू शकतात का? असा सवाल करत, “राम मंदिर लुटलं जातंय, हे विचारण्याचं धाडस तुमच्यात आहे की गद्दारीमुळे तुमचं रक्त नासलं?” अशा अत्यंत तिखट शब्दांत त्यांनी बंडखोरांवर प्रहार केला. सत्ताधाऱ्यांना कोणी प्रश्न विचारू नये म्हणूनच शिवसेना संपवण्याचा घाट घातला जात असल्याचा आरोप त्यांनी केला. बंडखोरांना टोला लगावताना ते म्हणाले की, “इथे तुम्ही वाघासारखं जीवन जगत होता, आता तिकडे गाढवासारखं जे लादलं जाईल ते वाहत राहा.” शेवटी, आमचे हिंदुत्व हे माणुसकी जपणारे आहे, मंदिरे लुटणारे नाही, असे स्पष्ट करत “मी शेवटपर्यंत लढणार, तुम्ही माझ्यासोबत आहात ना?” अशी साद त्यांनी उपस्थित शिवसैनिकांना घातली.
