बीव्हीजी ग्रुपच्या बेजबाबदार भेटवस्तूंमुळे भक्तांच्या भावना दुखावल्या
पंढरपूरच्या श्री विठ्ठल-रुक्मिणी मंदिरात एक धक्कादायक घटना घडली आहे. मंदिरात सुरक्षा सेवा पुरवणाऱ्या बीव्हीजी ग्रुपने दिवाळीच्या निमित्ताने कर्मचाऱ्यांना भेटवस्तू म्हणून ‘चिकन मसाला (Chicken Masala)’ पाठवल्याने वारकरी संप्रदाय आणि विठ्ठल भक्तांमध्ये तीव्र नाराजी पसरली आहे. या घटनेने मंदिराच्या पवित्र वातावरणात खळबळ उडाली आहे. पंढरपूर (Pandharpur) हे वारकरी संप्रदायाचे पवित्र केंद्र आहे, जिथे दरवर्षी लाखो भाविक ‘माऊली माऊली’चा जयघोष करत पायी वारी करतात. वारकरी परंपरेत शाकाहार, संयम आणि साधेपणा हे मूलभूत तत्त्व मानले जाते. मांसाहार, मद्यपान किंवा त्यासंबंधित कोणत्याही वस्तूंना येथे स्थान नाही. अशा पवित्र ठिकाणी चिकन मसाल्यासारख्या वस्तू भेट म्हणून वाटप झाल्याने भक्तांच्या भावना दुखावल्या गेल्या आहेत.
मिळालेल्या माहितीनुसार, बीव्हीजी ग्रुपला मे महिन्यापासून मंदिरात २२० सुरक्षा रक्षक पुरवण्याचा ५.७७ कोटी रुपयांचा ठेका मिळाला आहे. याशिवाय, स्वच्छता कर्मचारी आणि इतर सेवा आऊटसोर्सिंगद्वारे पुरवल्या जातात. दिवाळीच्या निमित्ताने कर्मचाऱ्यांना भेटवस्तू देण्यात आल्या, पण त्यात चिकन मसाल्याचे पाकीट आढळल्याने संतापाची लाट उसळली. भेटवस्तूंमध्ये कंपनीची इतर उत्पादनेही होती, पण चिकन मसाल्यामुळे सर्वांचे लक्ष तिकडेच गेले.यापूर्वी मंदिराच्या नियमांचे पालन न केल्याने मागील ठेकेदाराचा करार रद्द करण्यात आला होता. त्यानंतर निविदा प्रक्रियेत आठ एजन्सींनी ३.८५% इतका समान सेवा शुल्क कोट केला होता, ज्यामुळे आश्चर्य व्यक्त झाले. बीव्हीजीला ठेका मिळाला असला, तरी मंदिर समितीच्या कठोर नियमांचे पालन करण्याची जबाबदारी त्यांच्यावर आहे.या चुकीच्या भेटवस्तूंमुळे वारकरी संप्रदायातून तीव्र निषेध व्यक्त होत असून, बीव्हीजी ग्रुपने मंदिराच्या सांस्कृतिक आणि धार्मिक मूल्यांचा आदर न केल्याबद्दल जबाबदारी स्वीकारावी, अशी मागणी भक्त करत आहेत.
