केस खराब न करता घरच्या घरी हेअर कर्लिंग करण्याचे सोपे आणि सुरक्षित फंडे; पेन-पेन्सिलपासून ते वेण्यांपर्यंतचे भन्नाट पर्याय
सरळ आणि रेशमी केस प्रत्येकालाच आवडतात, मात्र बदलत्या फॅशननुसार अनेक महिलांना वेगवेगळ्या कार्यक्रमांसाठी कुरळ्या (Curly) केसांचा एक वेगळा आणि हटके लुक ट्राय करण्याची इच्छा असते. हा लुक मिळवण्यासाठी सहसा पार्लरमध्ये किंवा घरी हेअर कर्लर आणि हीटिंग टूल्सचा मोठ्या प्रमाणावर वापर केला जातो. परंतु, मशीनच्या या अतिउष्णतेमुळे केस कोरडे पडतात, निर्जीव होतात आणि मोठ्या प्रमाणावर तुटू लागतात. जर तुम्हाला केसांचे कोणतेही नुकसान न करता सुंदर नॅचरल कर्ल्स हवे असतील, तर घरात सहज उपलब्ध असणाऱ्या काही साध्या वस्तूंच्या मदतीने तुम्ही केसांना आकर्षक लुक देऊ शकता.
केसांना नैसर्गिकरित्या कुरळे करण्यासाठी ‘बारीक वेण्या’ घालणे हा सर्वात जुना आणि सुरक्षित उपाय आहे. रात्री झोपण्यापूर्वी केसांचे लहान-लहान भाग करून त्यांच्या घट्ट वेण्या घालाव्यात आणि सकाळी उठून त्या सोडल्यास केसांना छान वेव्ह्ज मिळतात. याशिवाय, घरात असणाऱ्या ‘पेन किंवा पेन्सिलचा’ वापर करूनही कर्ल्स करता येतात. केस थोडे ओलसर करून त्यांच्या बारीक बटा पेन्सिलभोवती गुंडाळून क्लिपने फिक्स कराव्या आणि काही तासांनी केस सोडावे. अगदी असाच प्रयोग तुम्ही प्लास्टिकच्या ‘स्ट्रॉ’ सोबतही करू शकता; स्ट्रॉभोवती केस गुंडाळून रबरबँड लावल्यास अतिशय सुंदर आणि घट्ट कर्ल्स तयार होतात.
याव्यतिरिक्त, केसांना उष्णतेपासून पूर्णपणे वाचवण्यासाठी ‘टिश्यू पेपरचा रोल’ तयार करून त्यावर केसांच्या बटा गुंडाळणे हा देखील एक उत्तम पर्याय आहे. जर घरात काहीच नसेल, तर केस थोडे ओले असताना ते ‘बोटांच्या मदतीने’ गोल-गोल फिरवून क्लिपच्या साहाय्याने काही तास बांधून ठेवल्यास मस्त नॅचरल कर्ल्स मिळतात. शेवटचा आणि सध्या सोशल मीडियावर खूप लोकप्रिय असलेला उपाय म्हणजे ‘रिबनचा वापर’. केसांना रिबनमध्ये नीट गुंडाळून रात्रभर ठेवल्यास सकाळी अगदी मऊ आणि सॉफ्ट कर्ल्स पाहायला मिळतात. हे घरगुती पर्याय वापरल्यास केसांचे आरोग्यही जपले जाते आणि महागड्या ब्युटी ट्रीटमेंटचा खर्चही वाचतो.
