अतिघाम आणि चिकटपणापासून सुटका मिळवण्यासाठी जीवनशैलीत करा ‘हे’ महत्त्वाचे बदल
उन्हाळ्याच्या दिवसांत घाम येणे ही एक सामान्य शारीरिक प्रक्रिया असली, तरी अतिप्रमाणात येणारा घाम आणि त्याची दुर्गंधी अनेकांसाठी डोकेदुखी ठरते. यामुळे केवळ अस्वस्थता निर्माण होत नाही, तर सार्वजनिक ठिकाणी वावरताना आत्मविश्वासावरही परिणाम होतो. या समस्येवर मात करण्यासाठी प्रसिद्ध सौंदर्यतज्ज्ञ आणि हर्बल स्किनकेअर एक्सपर्ट यांनी काही सोपे, नैसर्गिक आणि अत्यंत प्रभावी उपाय सुचवले आहेत, ज्यामुळे उन्हाळ्यातही तुमची त्वचा ताजीतवाने राहू शकते.
शहनाज हुसेन यांनी सुचवलेले ५ मुख्य उपाय:
शरीरात पाण्याची कमतरता झाल्यास डिहायड्रेशन वाढते आणि घाम अधिक येतो. यासाठी दिवसातून किमान ८ ते १० ग्लास पाणी प्यावे. आहारात नारळपाणी, ताक आणि लिंबूपाणी यांसारख्या नैसर्गिक पेयांचा समावेश करावा. तसेच जास्त तिखट, तेलकट आणि मसालेदार अन्न खाणे टाळावे, कारण असे पदार्थ शरीरातील उष्णता वाढवून घाम येण्याची प्रक्रिया वेगवान करतात. उन्हाळ्यात घामामुळे बॅक्टेरिया वाढतात, ज्यातून दुर्गंधी आणि त्वचेचे संसर्ग (Infections) होऊ शकतात. यासाठी दिवसातून किमान एकदा अँटीबॅक्टेरियल साबण वापरून आंघोळ करावी. आंघोळीसाठी खूप गरम पाणी न वापरता थंड किंवा कोमट पाणी वापरावे. आंघोळीच्या पाण्यात पेपरमिंट किंवा युकॅलिप्टस (निलगिरी) ऑइलचे काही थेंब टाकल्यास शरीराला नैसर्गिक थंडावा आणि दीर्घकाळ ताजेपणा मिळतो. घट्ट आणि सिंथेटिक कपड्यांमुळे घाम शरीरातच अडकून राहतो आणि दुर्गंधी वाढते. म्हणून उन्हाळ्यात नेहमी सूती (कॉटन) किंवा लिननचे सैल कपडे घालावेत. हलक्या रंगांचे कपडे सूर्यप्रकाश परावर्तित करत असल्याने शरीर थंड राहण्यास मदत होते. घराबाहेर असताना घाम आणि चिकटपणा नियंत्रित ठेवण्यासाठी कोरड्या किंवा ओल्या टिश्यू पेपरचा वापर करावा. कोरफड (एलोवेरा) किंवा काकडीचे अर्क असलेल्या रिफ्रेशिंग वाइप्सने चेहरा, मान आणि अंडरआर्म्स स्वच्छ केल्यास त्वचेला त्वरित थंडावा मिळतो. दुपारच्या कडक उन्हात बाहेर पडणे टाळावे. बाहेर जाताना टोपी आणि सनग्लासेसचा वापर करावा. याशिवाय, आंघोळीच्या पाण्यात कडुलिंबाचे पाणी किंवा गुलाबपाणी मिसळल्यास त्वचेवरील बॅक्टेरिया नष्ट होऊन दुर्गंधी कमी होते.
घाम येणे पूर्णपणे थांबवणे शक्य नसले, तरी योग्य जीवनशैली, नियमित स्वच्छता आणि मानसिक ताण कमी करून या समस्येवर नक्कीच नियंत्रण मिळवता येते. शहनाज हुसेन यांचे हे नैसर्गिक उपाय स्वीकारल्यास तुमचा उन्हाळा सुसह्य आणि दुर्गंधीमुक्त होऊ शकतो.
