मार्च महिन्यापासूनच राज्यभरात उष्णतेची तीव्रता वाढू लागली असून मुंबईसह अनेक भागांमध्ये तापमानात लक्षणीय वाढ झाली आहे. दुपारची कडक उन्हे आता सकाळीच जाणवू लागली असून नागरिकांना प्रचंड उकाड्याचा सामना करावा लागत आहे.
या वाढत्या उष्णतेचा परिणाम केवळ माणसांवरच नाही, तर इलेक्ट्रॉनिक उपकरणे आणि वाहनांवरही होत आहे. विशेषतः बाईकच्या इंजिनवर याचा मोठा परिणाम होतो. अनेक वेळा इंजिन जास्त गरम होऊन बाईकला आग लागल्याच्या घटना घडतात. त्यामुळे उन्हाळ्यात बाईकची योग्य काळजी घेणे अत्यंत गरजेचे आहे.
यासाठी सर्वप्रथम योग्य दर्जाचे इंजिन ऑईल वापरणे आवश्यक आहे, कारण उष्णतेमुळे ऑईल लवकर खराब होते. तसेच बाईकची नियमित सर्व्हिसिंग केल्यास इंजिनचे तापमान नियंत्रणात राहते.
एअर फिल्टर स्वच्छ ठेवणेही तितकेच महत्त्वाचे आहे. धुळीमुळे फिल्टर ब्लॉक झाल्यास इंजिनला योग्य प्रमाणात हवा मिळत नाही आणि ते अधिक तापते.
टायरमध्ये योग्य प्रमाणात हवा ठेवणे गरजेचे आहे. कमी किंवा जास्त हवा भरल्यास इंधनाचा वापर वाढतो आणि टायरचे नुकसान होऊ शकते.
तसेच बाईक शक्यतो उन्हात उभी करू नये. यामुळे इंजिनसह इतर भागांवर वाईट परिणाम होतो. ट्रॅफिकमध्ये किंवा सिग्नलवर थांबताना इंजिन बंद ठेवणेही फायदेशीर ठरते.
एकूणच, काही सोप्या सवयी अंगीकारल्यास उन्हाळ्यात बाईकचे इंजिन सुरक्षित ठेवता येते आणि अनावश्यक खर्च टाळता येतो.
