आयपीएल २०२६ च्या १९ व्या हंगामात श्रेयस अय्यरच्या नेतृत्वाखालील पंजाब किंग्सने आपला विजयी धडाका कायम राखला आहे. शुक्रवारी, ३ एप्रिल रोजी झालेल्या चुरशीच्या सामन्यात पंजाबने गतविजेत्या चेन्नई सुपर किंग्सला त्यांच्याच होम ग्राऊंडवर ५ विकेट्सने पराभूत केले. गुजरात टायटन्सनंतर आता चेन्नईला धूळ चारत पंजाबने गुणतालिकेत (Points Table) थेट पहिल्या क्रमांकावर झेप घेतली आहे. पंजाबच्या या विजयामुळे राजस्थान रॉयल्सची दुसऱ्या स्थानी घसरण झाली असून, सलग दोन पराभवांमुळे चेन्नईचा संघ आता दहाव्या क्रमांकावर फेकला गेला आहे.
चेन्नईने विजयासाठी दिलेल्या २१० धावांच्या आव्हानाचा पाठलाग करताना पंजाबच्या फलंदाजांनी आक्रमक पवित्रा घेतला. हा विजय पंजाबने ८ चेंडू शिल्लक असतानाच मिळवला, ज्यामुळे त्यांच्या नेट रनरेटमध्ये (०.६७३) मोठी सुधारणा झाली आहे. दुसरीकडे, चेन्नईचा नेट रनरेट उणे २.५६२ इतका घसरला असून ऋतुराज गायकवाडच्या संघासाठी आता धोक्याची घंटा वाजली आहे. या एका विजयामुळे संपूर्ण पॉइंट्स टेबलचे गणित बदलले असून दिल्ली चौथ्या तर मुंबई इंडियन्स पाचव्या स्थानी पोहोचली आहे. राजस्थान, आरसीबी, दिल्ली आणि मुंबई हे संघ अद्याप अजिंक्य असले तरी गुणानुसार पंजाब सध्या ‘बॉस’ ठरली आहे.
४ एप्रिल रोजी या हंगामातील पहिला ‘डबल हेडर’ रंगणार आहे. दुपारी होणाऱ्या सामन्यात दिल्ली कॅपिटल्स आणि मुंबई इंडियन्स यांच्यात अरुण जेटली स्टेडियमवर लढत होईल. तर संध्याकाळच्या सामन्यात गुजरात टायटन्सचा सामना राजस्थान रॉयल्सशी होणार आहे. संजू सॅमसनच्या राजस्थान रॉयल्सला हा सामना जिंकून पंजाबला मागे टाकत पुन्हा एकदा गुणतालिकेत पहिले स्थान मिळवण्याची सुवर्णसंधी आहे. सध्या गुजरात, लखनौ, कोलकाता आणि चेन्नई हे चार संघ आपल्या पहिल्या विजयाची प्रतीक्षा करत असल्याने आजच्या सामन्यांकडे सर्वांचे लक्ष लागले आहे.
