सलामीचा शाप मोडत पलटनचा विजयी श्रीगणेशा; रोहित-रायनच्या दीडशतकी भागीदारीने वानखेडे गाजवलं
मुंबई इंडियन्सने अखेर आपला १३ वर्षांचा इतिहास बदलून दाखवला आहे! सलग १३ सीझन सलामीचा सामना हरण्याचा नकोसा विक्रम पुसून काढत मुंबईने कोलकाता नाईट रायडर्सवर ५ चेंडू राखून थरारक विजय मिळवला. २२१ धावांचे हिमालयासारखे लक्ष्य समोर असताना माजी कर्णधार रोहित शर्मा (३८ चेंडूत ७८ धावा) आणि रायन रिकेलटॉन (४३ चेंडूत ८१ धावा) यांनी पहिल्या विकेटसाठी १४८ धावांची तुफानी भागीदारी केली. रोहितच्या बॅटमधून निघालेल्या ६ उत्तुंग षटकारांनी वानखेडे स्टेडियमवर जणू धावांचा पाऊस पाडला आणि मुंबईच्या विजयाचा पाया रचला.
विजयाचा आनंद मोठा असला, तरी सामन्याच्या मधल्या फळीत रोहित शर्माकडून झालेली एक चूक मुंबईला चांगलीच महागात पडली होती. केकेआरच्या डावातील १५ व्या ओव्हरमध्ये रोहितने अंगकृष रघुवंशीचा झेल सोडला, जो तेव्हा केवळ २१ धावांवर खेळत होता. या जीवनदानाचा फायदा उठवत रघुवंशीने ५१ धावा कुटल्या आणि रिंकू सिंगसोबत ६० धावांची भागीदारी करत कोलकात्याचा स्कोअर २२० पर्यंत पोहोचवला. रोहितचा हा ‘ड्रॉप कॅच’ मुंबईला विजयापासून दूर नेतो की काय, अशी भीती निर्माण झाली होती. मात्र, सलामीवीरांच्या आक्रमक पवित्र्यामुळे अखेर मुंबईने २० व्या ओव्हरमध्ये बाजी मारलीच.
