नाशिकमधील स्वयंघोषित बाबा अशोक खरात प्रकरणामुळे राज्यातील राजकारणात खळबळ उडाली आहे. अनेक महिलांवर अत्याचार केल्याच्या आरोपांनंतर त्याला अटक करण्यात आली असून, या प्रकरणातील व्हिडिओ आणि फोटो समोर आल्यानंतर त्याची गंभीरता अधिक वाढली आहे. त्याचबरोबर काही राजकीय व्यक्तींशी त्याचे संबंध असल्याच्या चर्चाही रंगत आहेत.
या पार्श्वभूमीवर राष्ट्रवादी काँग्रेस (शरद पवार गट) नेते रोहित पवार यांनी एक धक्कादायक दावा केला आहे. त्यांनी अजित पवार यांच्या घराबाहेर संशयास्पद प्रकार घडल्याचे सांगत काळ्या जादूसारख्या गोष्टींचा उल्लेख केला.
रोहित पवार यांच्या म्हणण्यानुसार, बारामती आणि मुंबईतील अजित पवार यांच्या निवासस्थानी अशा प्रकारच्या घटना दिसून आल्या आहेत. तसेच, अजित पवार यांच्या पक्षातील काही नेत्यांच्या हातावर जखमा असल्याचेही त्यांनी नमूद केले आणि या सर्व गोष्टींमागे नेमके कारण काय आहे, असा सवाल उपस्थित केला.
त्यांनी पुढे शंका व्यक्त केली की, कोणीतरी जाणूनबुजून अजित पवार यांची राजकीय ताकद कमी करण्यासाठी अशा प्रकारचे कृत्य करत होते का? या संपूर्ण प्रकरणाची सखोल चौकशी होणे आवश्यक असल्याचे त्यांनी म्हटले.
याशिवाय, अजित पवार यांच्या अपघाताबाबतही रोहित पवार यांनी प्रश्न उपस्थित करत तो अपघात होता की त्यामागे काही घातपात होता, याचा तपास व्हावा, अशी मागणी केली आहे. या विधानामुळे राजकीय वर्तुळात नव्या चर्चांना उधाण आले आहे.
