“मी इथे कशासाठी आलोय.. बस झालं आता!” म्हणत सोनूने टाळले विद्यार्थ्यांच्या आंदोलनावरील प्रश्न; चाहत्यांकडून नाराजी व्यक्त करत ट्रोलिंगचा पाऊस.
सध्या देशात NEET परीक्षेतील पेपरफुटी आणि अनियमिततेच्या मुद्यावरून विद्यार्थ्यांचे आंदोलन तीव्र झाले असून, यावर बोलण्यासाठी अनेक बॉलिवूड व मराठी सेलिब्रिटी पुढे येत आहेत. मात्र, याच मुद्द्यावर प्रसिद्ध गायक सोनू निगम यांनी प्रतिक्रिया देण्यास स्पष्ट नकार दिल्यामुळे सोशल मीडियावर मोठा वाद निर्माण झाला आहे. एका कार्यक्रमादरम्यान मीडियाशी संवाद साधत असताना जेव्हा त्यांना देशात सुरू असलेल्या विद्यार्थी आंदोलनाबाबत प्रश्न विचारण्यात आला, तेव्हा ते चांगलेच संतापले. “मी इथे कशासाठी आलोय.. बस्स बस्स,” असे म्हणत त्यांनी तो विषय तिथेच थांबवण्याचा प्रयत्न केला. पुढेही यावर विचारण्याचा प्रयत्न केला असता, “आता पुरे झालं,” असे म्हणत ते तिथून निघून गेले, ज्याचा व्हिडिओ सध्या सोशल मीडियावर वाऱ्यासारखा व्हायरल होत आहे.
सोनू निगम यांच्या या वागण्यामुळे संतप्त झालेल्या नेटकऱ्यांनी सोशल मीडियावर तीव्र नाराजी व्यक्त केली आहे. एका युझरने त्यांच्या कॉन्सर्टची तिकिटे रद्द करत असल्याचे म्हटले, तर काहींनी “यांना केवळ पैशांशी आणि स्वतःच्या प्रसिद्धीशी मतलब आहे,” अशा शब्दांत रोष व्यक्त केला. यापूर्वी इतर सामाजिक व धार्मिक विषयांवर परखडपणे मत मांडणारे सोनू निगम आज विद्यार्थ्यांच्या भविष्याशी जोडलेल्या एवढ्या मोठ्या राष्ट्रीय प्रश्नावर का गप्प आहेत, असा थेट सवाल चाहत्यांनी उपस्थित केला आहे. एकीकडे आलिया भट्ट, सोनू सूद, स्वरा भास्कर, रितेश देशमुख यांसारखे अनेक कलाकार विद्यार्थ्यांच्या समर्थनार्थ उभे राहत असताना, सोनू निगम यांच्या या मौनामुळे चाहत्यांमध्ये मोठी निराशा पाहायला मिळत आहे.
